عابدی خاندان سے اظہار تعزیت کرتے ہیں، قاتلوں کو جلد از جلد گرفتار کرکے کیفر کردار تک پہنچایا جائے،علامہ عارف واحدی
اسلام آباد26 دسمبر2018 ء (جعفریہ پریس )شیعہ علماءکونسل پاکستان کی جانب سے سابق رکن قومی اسمبلی علی رضا عابدی کی ٹارگٹ کلنگ کی شدید الفاظ میں مذمت، قاتلوں کی فوری گرفتاری کا مطالبہ، قائد ملت جعفریہ پاکستا ن علامہ سید ساجد علی نقوی کی جانب سے لواحقین سے اظہار تعزیت ، علامہ عارف واحدی کہتے ہیں ایک وقفہ کے بعد دوبارہ ٹارگٹ کلنگ کا سر اٹھانا انتہائی تشویشناک ہے۔ گزشتہ رات سابق رکن قومی اسمبلی اور کراچی کی معروف شخصیت علی رضا عابدی کی ان کی رہائش گاہ کے سامنے ٹارگٹ کلنگ کے واقعہ کی شدید الفاظ میں مذمت کرتے ہوئے شیعہ علماءکونسل پاکستان کے سیکرٹری جنرل علامہ عارف حسین واحدی نے کہاکہ ایک وقفہ کے بعد دوبارہ ٹارگٹ کلنگ کا سر اٹھانا انتہائی تشویشناک ہے، دہشت گردی کے خاتمے کےلئے دہشت گردوں کا جڑ سے خاتمہ ضروری ہے۔ انہوںنے قائد ملت جعفریہ پاکستان علامہ سید ساجد علی نقوی کی جانب سے پسماندگان سے اظہار تعزیت کرتے ہوئے کہاکہ ہم سب آپ کے غم میں برابر کی شریک ہے ، قائد ملت جعفریہ پاکستان کی جانب سے اس سانحہ پر گہری تشویش اور دلی افسوس کا اظہار کیاگیاہے۔ علامہ عارف حسین واحدی کا کہنا تھاکہ شہر قائد میں ایک مختصر وقفہ کے بعد دوبارہ امن و امان کی صورتحال خراب ہونا انتہائی تشویشناک ہے، کراچی کے امن سے پورے ملک کا امن وابستہ ہے، کراچی کو پاکستانی معیشت میں ریڑھ کی ہڈی کی سی حیثیت حاصل ہے، انہوںنے پرزور الفاظ میں مطالبہ کرتے ہوئے کہاکہ قاتلوں کو جلد از جلد گرفتار کرکے کیفرکردار تک پہنچایا جائے اور دہشت گردی کے خاتمے کےلئے مزید سخت اقدامات کئے جائیں ۔