مارچ ۲۳ یوم تجدید عہد کے طور پر منائیں قائد ملت جعفریہ پاکستان
ملکر عہد کریں، قوم کو کرونا وائرس سے نجات دلائیں گے،قائد ملت جعفریہ
راولپنڈی/ اسلام آباد 22مارچ 2020 ء( جعفریہ پریس ) قائد ملت جعفریہ پاکستان علامہ سید ساجد علی نقوی نے یوم پاکستان پر اپنے پیغام میں کہا ہے کہ قرارداد پاکستان جہاں عوام کو وطن دوستی اور حب الوطنی کی طرف متوجہ کرتی ہے وہاں جمہوریت ‘ قانون پر عمل داری اورانصاف جیسی ذمہ داریوں کی طرف رہنمائی کرتی ہے۔ پاکستان کو لاحق تمام داخلی و خارجی خطرات اور امراض کا علاج یہی ہے کہ سب سے پہلے عوام بیدار‘ متحد اور منظم ہوں۔
انہوں نے کہا کہ23مارچ ایسے دن آرہا ہے جب کہ کورونا وائرس کی وجہ سے وطن عزیز شدید مشکلات سے دو چار ہے، قوم پریشان ہے، ضرورت اس امر کی ہے کہ جس طرح قوم نے متحد ہو کر آزادی حاصل کی اسی طرح ہم سب کو اتحاد و یکجہتی کے ساتھ اس موذی وبا کا مقابلہ کر کے اس سے نجات حاصل کرنا ہوگی۔ تاکہ یہ دن یوم نجات کے طور پر یاد رکھا جائے۔
آخر میں انہوں نے قوم سے اپیل کی آئیے تجدید عہد کریں، وقت کا تقاضا ہے کہ ہم ہر قسم کے باہمی اختلافات کو پس پشت ڈال کرتمام تر توجہ کورونا وائرس کا مقابلہ کرنے میں صرف کریںاور کورونا وائرس کیلئے تمام احتیاطی تدابیر پر سختی سے عمل کریں تاکہ ملک اس موذی وبا سے نجات حاصل کرسکے۔