اسرائیل کے مظلوم فلسطینیوں پر وحشیانہ مظالم عالمی امن کیلئے خطرہ ہیں،ترجمان قائد ملت

اسرائیل کے مظلوم فلسطینیوں پر وحشیانہ مظالم عالمی امن کیلئے خطرہ ہیں،زاہد علی آخونزادہ
اسرائیل کے توسیع پسندانہ اقدامات اپنے ناجائز قبضے کو تقویت دینے کیلئے ہیں، ترجمان قائد ملت جعفریہ پاکستان
اقوام متحدہ اور او آئی سی اسرائیلی مظالم کو روکیں اور عالمی عدالت میں اسرائیل کے خلاف مقدمہ چلائیں، زاہد علی آخونزادہ ترجمان قائد ملت جعفریہ پاکستان
روالپنڈی 8جولائی 2020 ( جعفریہ پریس پاکستان ) قائد ملت جعفریہ پاکستان علامہ سید ساجد علی نقوی کے ترجمان زاہد علی آخونزادہ نے کہا ہے کہ فلسطینی عوام پر قابض اسرائیلی فوج کے وحشیانہ مظالم اور قتل و غارتگری کے واقعات عالمی امن کیلئے خطرہ ہیں اور اگر عالمی حقوق و انصاف کے اداروں نے اس کا فوری نوٹس لے کر اسرائیلی مظالم کا راستہ نہ روکا تو یہ جنگ دنیا کو اپنی لپیٹ میں لے لے گی۔ اپنے ایک بیان میں قائد ملت جعفریہ پاکستان کے ترجمان زاہد علی آخونزادہ نے کہا کہ اسرائیل کی غاصب اور ناجائز ریاست فلسطین میں ایک عرصے سے توسیع پسندانہ کاروائیوں میں مصروف ہے اور حالیہ اقدامات کے بعد مقامی فلسطینی عوام پر مسلسل وحشیانہ مظالم ڈھانے سے اسرائیل کے مکروہ عزائم اب کھل کر سامنے آ گئے ہیں کہ وہ توسیع پسندانہ ناجائز اقدامات کے ذریعے اپنے غاصبانہ قبضے کو تقویت دینے کیلئے کوشاں ہے اور اس ضمن میں وہ کسی عالمی قانون کو خاطر میں لائے بغیر مسلسل فلسطینیوں کی نسل کشی کر کے اقوام متحدہ اور دیگر عالمی انصاف کے اداروں کی حیثیت چیلنج کر رہا ہے مگر افسوس عالمی ادارے اسرائیل کے ان ناپاک عزائم پر خاموش تماشائی بنے بیٹھے ہیں۔ انہوں نے واضح کیا کہ ان وحشیانہ کارروائیوں کے خلاف دنیا میں تشویش پائی جاتی ہے اور اگر عالمی حقوق و انصاف کے اداروں نے اس پر فوری ایکشن نہ لیا تو یہ گھناﺅنا کھیل دنیا کے امن کیلئے خطرہ بن سکتا ہے۔ انہوں نے مذید کہا کہ قائد ملت جعفریہ پاکستان علامہ سید ساجد علی نقوی کی ہدایت پر ملک بھر میں مذہبی سیاسی جماعتیں فلسطینی عوام سے اظہار یک جہتی کا مظاہرہ کر کے اسرائیلی ظلم و ستم کے خلاف صدائے احتجاج بلند کرتی رہی ہیں اور فلسطین کے دیرینہ مسئلے کے حل تک مظلوم فلسطینی بھائیوں کی اخلاقی، سیاسی، سفارتی اور مذہبی حمایت جاری رکھیں گی۔ قائد ملت جعفریہ کے ترجمان نے اقوام متحدہ، عالمی عدالت انصاف اور او آئی سی سے فوری طور پر اسرائیلی توسیع پسندانہ اقدامات کو روکنے اور قتل و غارتگری کے واقعات کا نوٹس لینے سمیت عالمی عدالت انصاف میں اسرائیل کے خلاف فلسطینی عوام کے نسل کشی کا مقدمہ چلانے کا مطالبہ کیا جبکہ انہوں نے امت مسلمہ سے بھی اپیل کی کہ وہ باہم متحد ہو کر اسرائیل کے مظالم کے خلاف صدائے احتجاج بلند کریں اور عملی جد و جہد سے فلسطینی بھائیوں کے قتل عام اور اسرائیلی توسیع پسندی کو روکیں۔

LEAVE A REPLY

Please enter your comment!
Please enter your name here