آیت اللہ شیخ باقر النمرکی شہادت ایک عدالتی قتل ہے۔انسانی حقوق کے عالمی ادارے اس کا نوٹس لیں (عبداللہ رضا، ڈویژنل صدر جے ایس او پاکستان راولپنڈی ڈویژن)

اسلام آباد( ) جعفریہ اسٹوڈنٹس آرگنائزیشن پاکستان راولپنڈی ڈویژن کے صدر برادر عبداللہ رضا نے اپنے ایک بیان میں کہا ہے کہ سعودی عرب میں آیت اللہ شیخ باقر النمر سمیت ۴۷ افراد کا عدالتی قتل کیا گیا ہے۔ آیت اللہ شیخ النمر باقر النمر نے ہمیشہ پر امن راستہ اختیار کیا اور انہوں نے کبھی بھی تشدد کو ہوا نہیں دی۔ ان کا مطالبہ صرف یہ تھا کہ ملک میں عام انتخابات کروائے جائیں تا کہ سعودی عوام کو ان کا حق مل سکے۔
ڈویژنل صدر کا کہنا تھا کہ سعودی حکومت نے ہمیشہ کی طرح فرقہ واریت کو ہوا دیتے ہوئے آیت اللہ شیخ النمر باقر النمر کو بھی صرف اسی وجہ سے تختہ دار پر لٹکایا کیونکہ وہ ایک شیعہ عالم دین تھے۔ ان کے مقدمے کا ٹرائل کرتے ہوئے انصاف کے تقاضوں کو مدنظر نہیں رکھا گیا۔ یک طرفہ مقدمہ چلا کر ان کو سزائے موت دی گئی۔یہ سزائے موت نہیں بلکہ ایک عدالتی قتل ہے۔
ان کا مزید کہنا تھا کہ انسانی حقوق کے علمبردار عالمی اداروں کو چاہیے کہ وہ اس عدالتی قتل کا نوٹس لیں ۔ سعودی حکومت اس وقت شتر بے مہار کی طرح ہے اور وہ جو چاہے کرتی پھرتی ہے۔ مسلم امہ کہ جسے امت واحدہ ہونا چاہیے تھا وہ اس وقت ٹکڑوں میں بٹ چکی ہے۔ آیت اللہ باقر النمر سمیت۴۷ افراد کی بہیمانہ شہادت سے صاف پتہ چلتا ہے کہ سعودی حکومت ہر اس شخص کو تختہ دار تک لے جانے کے لیے تیار ہے کہ جو ان کے کالے کرتوت عوام کے سامنے رکھتے ہوئے صدائے احتجاج بلند کرے۔ سعودی حکومت آزادی رائے کو اپنے پیروں تلے روند چکی ہے ۔