اللہ تعالی انقلاب اسلامی ایران کو انقلاب امام مہدیؑ تک متصل فرمائے۔علامہ محمد رمضان توقیر

جعفریہ پریس – پشاور انقلاب اسلامی جمہوریہ ایران کی پینتیسویں سالگرہ کی تقریب کے موقع پرخانہ فرہنگ ایران پشاور میں منعقدہ تقریب میں دعائیہ کلمات میں خطاب کرتے ہوئے شیعہ علماء کونسل خیبر پختونخوا کے صوبائی صدر علامہ محمد رمضان توقیر نے کہا ہے کہ امام خمینی کی محنت ،کوششوں اور اللہ تعالی پر توکل کامل کی وجہ سے ایران میں آنے والااسلامی انقلاب آج تک اپنی آب و تاب سے صنعتی،معاشی،سیاسی،دفاعی،آئی ٹی ٹیکنالوجی وغیرہ میں ترقی کرتا ہوا قائم ودائم ہے ،ہمارے لئے یہ خوشی کی بات ہےکہ آج ہم انقلاب اسلامی جمہوریہ ایران کی پینتیسویں سالگرہ منارہے ہیں ۔
علامہ محمد رمضان توقیر نے مزید کہا کہ انقلاب اسلامی ایران کی وجہ سے دنیا عالم کے بہت سے اسلامی ممالک مصر، شام،لبنان،بحرین،عراق افغانستان،وغیرہ میں اسلامی بیداری کی تحریکیں شروع ہوئیں اورمسلمانوں کو شعور حاصل ہوا کہ اگر انسان صرف اللہ تعالی پر یقین کامل کرلے تو دنیا کی سپر پاور سے بھی نجات حاصل کر لیتا ہےاور یہ امام خمینی نے کر کے دیکھایاہے۔
انہوں نے کہا کہ ہماری دعا ہے کہ انقلاب اسلامی ایران کو ہمارے حقیقی وارث امام مہدی آخرالزمانؑ کے انقلاب برپا ہونے تک قائم ودائم رکھے۔ اور رہبر معظم سید علی خامنہ ای کا سایہ شفقت ہمیشہ ہمارے سروں پر برقرار رکھے۔ آخر میں انہوں نے ملت ایران اور ملت پاکستان کو انقلاب اسلامی ایران کی پینتیسویں سالگرہ کی مبارک بعد پیش کی۔