ایسے عناصر کو لگام دی جائے جو غلیظ زبان استعمال کرکے ملک میں انارکی پھیلانا چاہتے ہیں،علامہ عارف حسین واحدی

جعفریہ پریس- حکومت اُن لوگوں کی حوصلہ شکنی کرے جو ملک میں فرقہ واریت پھیلا رہے، ایسے عناصر کو لگام دی جائے جو غلیظ زبان استعمال کرکے ملک میں انارکی پھیلانا چاہتے ہیں۔ ان خیالات کا اظہار شیعہ علما کونسل پاکستان کے مرکزی سیکرٹری جنرل علامہ  عارف حسین واحدی نے اسلام آباد میں میڈیا کانفرنس کے موقع پر کیا۔ انہوں نے کہا کہ جب تک پاکستان میں غلیظ نعروں کو بند نہ کیا گیا امن کا قیام ممکن نہیں ہوسکے گا۔ علامہ  عارف حسین واحدی نے مطالبہ کیا کہ حکومت علماء کرام کی تجاویز پر عمل درآمد کرے تا کہ پاکستان میں امن کا قیام ممکن بنایا جا سکے۔ اس موقع پر سانحہ راولپنڈی کو ملک دشمن عناصر کی کارروائی قرار دیتے ہوئے سینیٹر طلحہ محمود نے کہا ہے کہ حکومت کو حقیقی امن کے قیام کیلئے ٹھوس اقدامات کرنا ہوں گے۔ انہوں نے کہا کہ سانحہ راجہ بازار مسالک کی ایک دوسرے سے دوری کے باعث پیش آیا۔ سنیٹر طلحہ محمود کا مزید کہنا تھا کہ غلط فہمییوں کے باعث مسالک کے درمیان دوریاں بڑھ گئی ہیں، جس کا فائدہ اٹھایا گیا، اب یہ معلوم نہیں کہ فائدہ کس نے اٹھایا۔