شیعہ علماء کونسل ضلع خیرپور میرس کا اہم اجلاس، 8 مارچ کو شہدائے شکارپور کے چہلم میں شرکت کے لئے خیرپور سے 200 گاڑیوں پرمشتمل ” کاروان وفا ” شکارپور روانہ ہوگا

جعفریہ پریس – بروز جمعہ 20 فروری شیعہ علماء کونسل ضلع خیرپور میرس کا اجلاس ضلعی صدر جناب حجت الاسلام و المسلمین علامہ سید اسد اقبال زیدی قمی کے زیر صدارت رضویہ امام بارگاہ مل کالونی خیرپور میں منعقد ہوا،  اجلاس میں اڈیشنل مرکزی سیکرٹری جنرل معظم بلوچ ، سکھر ڈویژن کے صدر سید منور شاہ اور ضلعی سیکریٹری جنرل ایڈوکیٹ سید امتیاز حسین شاہ نقوی سمیت ضلع، تعلقہ جات اور سٹی عہداروں اور کارکنوں نے بھرپور شرکت کی۔ اجلاس کے آغاز پر تلاوت قرآن پاک کے بعد شہدائے ملت بالخصوص شہدائے شکارپور، پشاور اور شہدائے اسلام آباد اور دیگر دہشتگردی کے واقعات میں شہید ہونے والوں کے ایصال ثواب  کیلئے فاتحہ خوانی کی گئی۔ اجلاس کی باقاعدہ کاروائی ضلعی سیکریٹری جنرل ایڈوکیٹ سید امتیاز حسین شاہ نقوی نے چلائی۔
اس موقع پر اجلاس سے خطاب کرتے ہوئے ضلعی صدر جناب حجۃ الاسلام و المسلمین علامہ سید اسد اقبال زیدی قمی نے کہا کہ افسوس کی بات ہے کہ نیشنل ایکشن پلان کا دائرہ کار صرف لوڈ اسپیکر کے استعمال تک محدود ہے جبکہ ملک میں دہشتگردی میں ملوث قاتل دندناتے پھر رہے ہیں، شہری خوف و ہراس کا شکار ہیں اور ریاست تماشاگر بنی ہوئی ہے۔ شیعہ علماء کونسل ضلع خیرپور میرس، شیعان پاکستان پر ظلم و ستم، منظم دہشتگردی اور ریاست کی بے حسی و نا انصافی کے خلاف آواز احتجاج بلند کرتی ہے۔
انہوں نے کہا کہ 8 مارچ کو شہدائے شکارپور کے چہلم میں ضلع خیرپور بھرپور شرکت کرے گا اور پورے ضلع سے 200 گاڑیوں پر مشتمل ” کاروان وفا  ” شکارپور روانہ ہو گا۔  21 فروری سے پورے ضلع کا تنظیمی دورہ شروع کیا جائے گا جس کے لئے ضلع اور تعلقہ سطح پر کارکنان اور عہدہ داران پر مشتمل کمیٹیان تشکیل دی جائیں گی جو پروگرام کو منظم کریں گی۔
اجلاس کے دیگر شرکاء نے اپنے بیان میں کہا کہ قائد ملت جعفریہ پاکستان حضرت آیت اللہ علامہ سید ساجد علی نقوی کی مدبرانہ و بصیرت افروز قیادت کو خراج تحسین پیش کرتے ہیں اور پورا ضلع کاروان وفا کی صورت میں چہلم کے پروگرام میں بھرپور شرکت کرے گا۔