علما کرام لوگوں کو سیلاب کی وسیع تباہی کی طرف متوجہ کریں اور وجوھات شرعیہ قائد محترم کے نام پہ بھیجی جائیں تا کہ شرعی طورپرمستحقین تک پہنچائی جا سکیں

جعفریہ پریس ۔ شیعہ علماء کونسل پاکستان کے مرکزی سیکرٹری جنرل علامہ عارف حسین واحدی نے ہدایت ٹی وی کو سیلاب کی تباہ کاریوں اور شیعہ علماء کونسل کی متاثرین کے لیے ریلیف کے بارے میں ایک انٹرویو میں کہا ہے کہ اس سال کا سیلاب وطن عزیز کے چند بڑے سیلابوں میں سے ایک ہے جس کی وجہ سے وسیع سطح پر تباہ کاری ھوئی، لوگ بےگھر ہوئے، سامان اور مویشی ڈوب گئے۔ اب تک زیادہ تر تباہی پنجاب کی طرف ہے مگر دیگر صوبے بھی متاثر ہوئے ہیں۔ کئی علاقے مکمل ڈوب گئے ہیں، اب ہم دو مرحلوں میں ریلیف کا کام کر رہے ہیں، 1- فوری طور پر لوگوں کو ضرورت کے مطابق راشن، میڈیکل کی بنیادی ضروریات، مویشیوں کا چارہ، کیمپ، بستر اور دیگر فوری ضروریات کو پورا کرنے کے لیے امداد بھجوانی شروع کر دی گئی ہے۔ دو کمیٹیاں تشکیل دی ہیں، 2- سیلاب کے بعد بحالی کا کام جو بہت وسیع ہوگا، ھم نے سیلاب کے آغاز پر ہی قائد ملت جعفریہ علامہ سید ساجد علی نقوی کے حکم پر پورے ملک میں امدادی اور ریلیف کیمپ لگانے کا اعلان کیا تھا، بہت سی جگہوں پر کیمپ لگائے گئے ہیں مگر ابھی بھی پورے ملک میں نہیں لگے، قائد محترم کا حکم ھے کہ پورے ملک میں تحصیل اور ضلعی سطح پر کیمپ لگائے جائیں مخیر حضرات بھرپور تعاون کریں، خاص کر بیرون ملک مخیر حضرات سے بھی اپیل ہے کہ سب ملکر امداد بھیجیں تاکہ لوگوں کو متاثرہ علاقوں میں بروقت امداد روانہ کی جا سکے اور اگلے مرحلے پر بحالی کا مرحلہ بھی جلدی شروع کیا جا سکے، علما کرام سے بھی اپیل ہے کہ لوگوں کو اتنی وسیع تباہی کی طرف متوجہ کیا جائے ، وجوھات شرعیہ قائد محترم کے نام پہ بھیجی جائیں تا کہ شرعی طور پر ذمہ داری کے ساتھ مستحقین تک پہنچائی جا سکیں،اللہ تعالی آپ سب کو اجرعطا فرمائے۔