غم حسینؑ نے پوری عالم انسانیت کو یکجا کردیاہے ،علامہ شبیر میثمی

غم حسین نے پوری عالم انسانیت کو یکجا کردیاہے ،علامہ شبیر میثمی
عزاداری کیخلاف کوئی قدغن قبول نہیں، عزاداری سید الشہدا کسی خاص مکتب یا مسلک سے نہ تو منسلک ہے نہ ہی کسی کے خلاف ہے
 ایسے اقدامات سے گریز کیا جائے جو معاشرے میں بے چینی کیساتھ جائز حقوق کے راستے میں رکاوٹ ہوں، سربراہ مرکزی محرم الحرام کمیٹی شیعہ علماء کونسل
راولپنڈی /اسلام آباد 22 جولائی 2023ء ( جعفریہ پریس پاکستان) سربراہ مرکزی محرم الحرام کمیٹی شیعہ علماء کونسل پاکستان ڈاکٹر علامہ شبیر حسن میثمی کہتے ہیں عزاداری کسی مسلک یا مکتب کی اجارہ داری نہ ہی کسی کے خلاف ہے ،غم حسین  نے پوری انسانیت کو یکجا کر دیا ہے ۔ایام عزا میں ایسے اقدامات سے گریز کیا جائے جو معاشرے میں بے چینی کیساتھ ساتھ جائز حقوق کے راستے میں رکاوٹوں کے مترادف ہوں ۔ان خیالات کا اظہارسربراہ مرکزی محرم الحرام کمیٹی شیعہ علماء کونسل پاکستان ڈاکٹر علامہ شبیر حسن میثمی اور سیکرٹری مرکزی محرم الحرام کمیٹی شیعہ علما ء کونسل پاکستان سید سکند عباس گیلانی ایڈووکیٹ نے ارباب اختیار کو متوجہ کرتے ہوئے کہاکہ محرم الحرام کا ماہ مقدس شہدائے کربلا کی عظیم قربانی کی نہ صرف یاد دلاتاہے کہ بلکہ ظلم و جبر کیخلاف کھڑے ہونے اور حریت فکر کی سب سے بڑی رہنمائی کا ذریعہ ہے۔ ملک کے معروضی حالات کے سبب عوامی تحفظ کی خاطر اقدامات ضروری البتہ ایسے انداز میں کئے جائیں جس سے نہ تو عوام کے جائز حقوق متاثر ہوں اور نہ خوف و ہراس کی فضاء پھیلے۔ ہم روز اول سے متوجہ کرتے آئے کہ ہمیں سنگینوں کے سائے، کنٹینرز کی قطاروں، خار دارتاروں اور راستوں کی بندش میں عزاداری قبول نہیں کیونکہ عزاداری سید الشہدا کسی خاص مکتب یا مسلک سے نہ تو منسلک ہے نہ ہی کسی کے خلاف ہے جو امن و امان کو متاثر کرے بلکہ یہ باہمی بھائی چارے کو مستحکم کرتی ہے ۔ انہوں نے مزید کہاکہ محرم کے آغاز کیساتھ ہی معاشرے کے انتہائی معزز و محترم شخصیات کو بھی بلاجواز فورتھ شیڈول جیسی بدنام زمانہ فہرستوں میں نہ صرف شامل کیا جاتا ہے بلکہ اپنے ہی ملک کے بعض شہروں میں ان کے جانے پر پابندیوں کے اعلانات کردیئے جاتے ہیں،یہ روایتی گھسی پٹی حرکتیں ہیں جس سے معاشرے میں اصلاح کی بجائے بگاڑ جنم لیتاہے لہٰذا ایسے اقدامات سے گریز کیا جانا لازمی ہے۔