پارا چنار، اسکول میں گھس کر فائرنگ، 7 اساتذہ شہید، تعلیمی ادارے بند

خیبرپختونخوا کے ضلع کرم کے علاقہ پاراچنار میں پاکستان اور افغان کی سرحد کے قریب ایک سرکاری اسکول میں نامعلوم افراد نے اندھادھند فائرنگ کرکے امتحانی ڈیوٹی پر مامور 7 اساتذہ سمیت 8 افراد کوبے دردی سے شہید کردیا۔واقعے کے خلاف احتجاج تعلیمی ادارے بند اور امتحان ملتوی کردیے گئے ہیں۔ فائرنگ کے واقعہ میں قیمتی جانوں کے ضیاع پر صدر، وزیراعظم اور دیگر نے افسوس کا اظہار کیا ہے۔ پولیس کے مطابق تری منگل سرکاری ہائی ا سکول میں نامعلوم افراد نے اسکول کے اسٹاف روم میں فائرنگ کی، گولیاں لگنے سے 7 اساتذہ جاں بحق ہو گئے، اس سے قبل نامعلوم افراد کی شلوزان روڈ پر چلتی گاڑی پر فائرنگ سے ایک ٹیچر جاں بحق ہو گیا۔جمعرات کو اپر کرم کے علاقہ پارا چنارکے تری منگل ہائی سکول میں مسلح افراد نے گھس کر فائرنگ کردی جس کے نتیجے میں 7اساتذہ جاں بحق ہوگئے۔پولیس نے بتایا کہ جاں بحق ہونے والوں میں میر حسین، جواد حسین، نوید حسین، جواد علی، محمد علی۔محمدحسین اور علی حسین شامل ہیں جن کا تعلق طوری بنگش قبائل سے بتایا جارہا ہے جبکہ وہ تری منگل ہائی سکول میں امتحانی ڈیوٹی سرانجام دے رہے تھے۔