گلگت بلتستان کو باقاعدہ صوبہ ڈکلیئر کیا جائے یاخاص خطے کی سہولیات برقرار رکھی جائیں

گلگت بلتستان کو باقاعدہ صوبہ ڈکلیئر کیا جائے یاخاص خطے کی سہولیات برقرار رکھی جائیں ، ترجمان قائدملت جعفریہ پاکستان
عوام کے حقوق کا تحفظ ریاست کی ذمہ داری، آئینی حقوق فراہم کرکے ہی فرائض لاگو کئے جاسکتے ہیں، گندم سبسڈی کا معاملہ سیاسی نہیں بلکہ خالصتاً عوامی مسئلہ، وفاق خطے کے عوام کے مسائل کاحل نکالے،ترجمان
 اسلام آباد 22دسمبر2023ء(  جعفریہ پریس پاکستان )ترجمان قائد ملت جعفریہ پاکستان علامہ سید ساجد علی نقوی کہتے ہیں گلگت بلتستان ملک کا اہم اور حساس ترین خطہ ہے، وقت کی ضرورت ہے کہ اس خطے کو اب تمام آئینی حقوق دے کر صوبہ کاڈکلیئر کیا جائے اور بطور خاص خطے کے تمام سبسڈیز اور سہولیات برقرار رکھی جائیں، گندم کی سبسڈی کے خاتمے کی بجائے خطہ کے عوام کے مسائل کو سنجیدگی سے لیا جائے اور ان کی امنگوں کے مطابق فیصلے کئے جائیں۔
ان خیالات کا اظہار ترجمان قائد ملت جعفریہ پاکستان علامہ سید ساجد علی نقوی نے گلگت بلتستان میں گندم سبسڈی کے معاملے پر احتجاج پر تبصرہ اور گلگت بلتستان سے آئے مختلف وفود کے ساتھ گفتگو کرتے ہوئے کیا۔ قائد ملت جعفریہ پاکستان علامہ سید ساجد علی نقوی نے کہاکہ کسی بھی خطے میں تمام آئینی و قانونی اقدامات اس وقت اٹھائے جاتے ہیں جب اس خطے کو تمام آئینی وقانونی حقوق فراہم کئے جائیں لہٰذا وقت کی ضرورت ہے کہ گلگت بلتستان جو ایک عرصہ سے سرزمین بے آئین ہے اسے آئینی دھارے میں باقاعدہ شامل کیا جائے او ر اسے آئینی حقوق فراہم کرتے ہوئے پھر اس پر فرائض لاگو کئے جائیںاورخاص خطے کی وہ تمام سہولیات، سبسڈیز برقرار رکھی جائیں ۔انہوںنے مزید کہاکہ حالیہ گندم سبسڈی کا معاملہ خالصتاً عوام اور خصوصاً غریب طبقے سے گہرا تعلق رکھتاہے جو براہ راست ان پر اثرانداز ہوگااس لئے اس معاملے پروفاق نہ صرف سنجیدگی سے غور کرے بلکہ اس پر مقامی سیاسی ، مذہبی، سماجی تنظیموں سمیت تمام شعبہ ہائے زندگی سے تعلق رکھنے والے افراد کے مطالبات پر غور کرکے اس کے مطابق حل نکالا جائے۔ انہوں نے مزید کہاکہ ریاست کی ذمہ داری ہے کہ وہ تمام شہریو ں کو ان کے بنیادی حقوق کی فراہمی یقینی بنانے کےلئے اقدامات اٹھاے اور ان کی جائز ضروریات کا خیال رکھے۔