عالم اسلام میں اتحاد کی محور و مرکز ذاتِ اقدس حبیب خدا، ختم الانبیاء حضرت محمد مصطفیٰ ﷺ کی ہے جن کی سیرتِ طیبہ پر عمل پیرا ہو کر اہل اسلام دنیا و آخرت میں سرخرو ہو سکتے ہیں۔علامہ ڈاکٹر شبیر میثمی
اب وقت آن پہنچا ہے کہ اہل اسلام پیغمبر اکرم ﷺ کی سیرت طبیہ پر عمل پیرا ہو کر فلسطین سمیت عالم اسلام کے دیرینہ مسائل کو متحد ہو کر حل کریں۔ علامہ شبیر میثمی
امت مسلمہ کی دنیا و آخرت میں کامیاب کا واحد راز باہمی اختلافات کو دور کر کے امت واحدہ کے طور پر اتحاد و اتفاق میں مضمر ہے۔علامہ ڈاکٹر شبیر میثمی
اسلام آباد: 14 اکتوبر 2025ء ( ) شیعہ علماء کونسل پاکستان کے مرکزی سیکرٹری جنرل اور ملی یکجہتی کونسل پاکستان کے مرکزی نائب صدر ممتاز مذہبی اسکالر علامہ ڈاکٹر شبیر حسن میثمی نے کہا کہ عالم اسلام کے مابین فکر و موقف کی ہم آہنگی وقت کی اہم ضرورت ہے جس کے فقدان کے باعث آج امت مسلمہ عالمی سطح پر اہل اسلام کے دیرینہ مسائل کے حل کے لیے ایک موقف پر متفق نہیں ہے۔ انہوں نے کہا کہ عالم اسلام میں اتحاد کی محور و مرکز ذاتِ اقدس حبیب خدا، ختم الانبیاء حضرت محمد مصطفیٰ ﷺ کی ہے جن کی سیرتِ طیبہ پر عمل پیرا ہو کر اہل اسلام دنیا و آخرت میں سرخرو ہو سکتے ہیں۔ انہوں نے میڈیا کی جھوٹی اور گمراہ کن خبروں اور کچھ جاہل مسلمانوں کے میڈیا کے غلط استعمال پر بھی تنبیہ کی کہ یہ امت کی وحدت کو کمزور کرتے ہیں اور فتنے پھیلاتے ہیں، جبکہ قرآن کریم میں اللہ تعالیٰ واضح طور پر فرماتا ہے کہ: ”اور جس چیز کا تمہیں علم نہیں ہے اس کے پیچھے نہ پڑو“ (سورہ بنی اسرائیل، آیہ 36)۔ انہوں نے اس بات پر زور دیا کہ حق اور انصاف کی تبلیغ کرکے میڈیا کو مثبت طور پر استعمال کریں تاکہ امت کے اتحاد کو مضبوط کیا جائے۔ ان خیالات کا اظہار انہوں نے جناح کنونشن سینٹر اسلام آباد میں مسلم ورلڈ لیگ کے زیر اہتمام منعقدہ پاکستانی علمائے کرام کے ساتھ دوسرے مشاورتی اجلاس میں ”پوزیشنز کی ہم آہنگی اور موقف کے اتحاد“ کے عنوان سے منعقدہ ایک پروقار تقریب سے عربی زبان میں خطاب کرتے ہوئے کیا۔
تقریب کی صدارت مسلم ورلڈ لیگ کے سیکرٹری جنرل الشیخ ڈاکٹر محمد بن عبدالکریم العیسٰی نے کی جبکہ مہمان خصوصی وفاقی وزیر مذہبی امور سردار محمد یوسف تھے۔ تقریب میں اسلام آباد میں سعودی عرب کے سفیر نواف بن سعید المالکی، جے یو آئی (ف) کے سربراہ مولانا فضل الرحمان، وزیر اعظم کے مشیر مولانا طاہر محمود اشرفی، رؤیت ہلال کمیٹی پاکستان کے سربراہ مولانا عبد الخبیر آزاد، اسلامی نظریاتی کونسل پاکستان کے سربراہ مولانا راغب نعیمی اور شیعہ علماء کونسل پاکستان کے مرکزی سیکرٹری اطلاعات زاہد علی آخونزادہ سمیت دیگر مذہبی اسکالرز نے شرکت کی۔
علامہ ڈاکٹر شبیر حسن میثمی نے خطاب کرتے ہوئے کہا کہ امت مسلمہ کا اتحاد قرآن کا آفاقی پیغام ہے اور اللہ تبارک وتعالیٰ کا حکم ہے کہ اللہ کی رسی کو مضبوطی سے تھامے رکھو اور آپس میں تفرقہ نہ ڈالو۔ انہوں نے مزید کہا کہ رسالت مآب ﷺ کی سیرتِ طیبہ، اتحادِ امت کے لیے بہترین نمونہ ہے اور اب وقت آن پہنچا کہ اہل اسلام پیغمبر اکرم ﷺ کی سیرت طبیہ پر عمل پیرا ہو کر فلسطین سمیت عالم اسلام کے دیرینہ مسائل کو متحد ہو کر حل کریں تاکہ دین حنیف اسلام کے فروغ اور دین حق کی تبلیغ کا فرض بخوبی ادا کیا جاسکے۔ انہوں نے اس امر پر زور دیا کہ امت مسلمہ کی دنیا و آخرت میں کامیاب کا واحد راز باہمی اختلافات کو دور کر کے امت واحدہ کے طور پر اتحاد و اتفاق میں مضمر ہے۔