قائد اعظمؒ کے افکار پر عمل سے پاکستان کا مستقبل محفوظ ہوگا | قائد ملت جعفریہ

قائد اعظمؒ کے افکار و تعلیمات پر عمل پیرا ہوکر ہی پاکستان کے مستقبل کو محفوظ بنایا جا سکتا ہے، 25 دسمبر کے موقع پر پیغام

قائد ملت جعفریہ پاکستان نے بابائے قوم حضرت قائد اعظم محمد علی جناحؒ کے یومِ ولادت کے موقع پر اپنے خصوصی پیغام میں کہا ہے کہ قائد اعظمؒ کے پاکستان کیلئے پوری قوم کو متحد ہوکر پرامن جدوجہد کرنا ہوگی، اور قائد اعظمؒ کے افکار و تعلیمات پر عمل پیرا ہوکر ہی پاکستان کے مستقبل کو محفوظ بنایا جا سکتا ہے۔

قائد ملت جعفریہ پاکستان نے کہا کہ جس آزاد، خودمختار اور نظریاتی مملکت کے قیام کی جدوجہد کو بانی پاکستان قائد اعظم محمد علی جناحؒ نے انتھک محنت، دیانت اور سیاسی بصیرت کے ساتھ پایۂ تکمیل تک پہنچایا، آج اس کی سلامتی، استحکام اور بقا کیلئے صرف ریاست ہی نہیں بلکہ ہر فرد پر بھی یہ ذمہ داری عائد ہوتی ہے کہ وہ اپنا مثبت، تعمیری اور ذمہ دارانہ کردار ادا کرے۔

انہوں نے افسوس کا اظہار کرتے ہوئے کہا کہ ملک میں عرصۂ دراز سے طبقاتی تفاوت، عدم مساوات اور عدل و انصاف کے فقدان جیسے مسائل جڑ پکڑ چکے ہیں، جن کا بنیادی سبب حکمرانوں کی غیر سنجیدہ پالیسیاں، ناقص طرزِ حکمرانی اور اپنے فرائضِ منصبی کو احسن انداز میں ادا نہ کرنا ہے، جس کے نتیجے میں عام آدمی شدید مشکلات اور محرومیوں کا شکار ہے۔

قائد ملت جعفریہ پاکستان نے زور دیتے ہوئے کہا کہ قائد اعظم محمد علی جناحؒ کے پاکستان کو داخلی طور پر مضبوط، مستحکم اور خوشحال بنانے کیلئے لازم ہے کہ قائد اعظمؒ کے افکار و تعلیمات پر مکمل اور مخلصانہ عمل درآمد کیا جائے، ریاستی نظام کو عادلانہ اور شفاف بنایا جائے، قانون کی حکمرانی کو یقینی بنایا جائے اور عوام کے بنیادی حقوق کا ہر صورت تحفظ کیا جائے۔

انہوں نے کہا کہ قومی اتحاد، باہمی رواداری، پرامن جدوجہد اور اجتماعی ذمہ داری کا شعور ہی وہ راستہ ہے جس پر چل کر پاکستان کو درپیش اندرونی و بیرونی چیلنجز سے نمٹا جا سکتا ہے اور بانی پاکستان کے خواب کے مطابق ایک مضبوط، باوقار اور خوددار ریاست کی بنیاد رکھی جا سکتی ہے۔