قائد ملت جعفریہ علامہ سید ساجد علی نقوی کی اعلی سطحی وفد کے ہمراہ اسلامی جمہوریہ ایران کے سفیر سے ملاقات
وفد میں علامہ عارف واحدی، علامہ ڈاکٹر شبیر حسن میثمی، سکندر عباس گیلانی اور زاہد علی آخونزادہ شامل تھے
جوابی حملوں میں دشمن کے دانت کھٹے کرنا اسلامی جمہوریہ ایران کی لیے فتح مبین ہے قائد ملت جعفریہ پاکستان
اس جنگ میں رہبر معظم آیت اللہ خامنہ ای بابصیرت، باحکمت اور دانشمند عالمی رہنماء بن کر ابھرے اور ایران سے متعلق سب غلط فہمیوں کا خاتمہ ہوا۔ علامہ سید ساجد علی نقوی
پاکستانی عوام ایرانی عوام کے شانہ بشانہ کھڑی ہے۔قائد ملت جعفریہ علامہ سید ساجد علی نقوی
پاکستانی حکومت، عوام اور میڈیا کے شکریہ جو عالم اسلام کی ہر مشکل گھڑی میں ساتھ آواز بلند کرتا رہا۔ رضا امیر مقدم
فلسطینوں کے قاتل اسرائیل کے پشت پناہ امریکہ کا ظالمانہ اور سفاکانہ چہرہ دنیا کے سامنے آشکار ہو چکا۔ ایران کسی بھی جارحیت پر خاموش نہیں بیٹھے گا۔ رضا امیری مقدم
اسلام آباد: ( جعفریہ پریس پاکستان )24 جون 2025
قائد ملت جعفریہ پاکستان علامہ سید ساجد علی نقوی دامت برکاتہ کی سربراہی میں شیعہ علماء کونسل پاکستان کے اعلی سطحی وفد نے اسلامی جمہوریہ ایران کے اسلام آباد میں متعین سفیر عزت مآب آقائ رضا امیری مقدم سے ملاقات کی اور برادر ہمسایہ اسلامی ملک ایران پر امریکہ اور اسرائیل کے حملوں کی مذمت کرتے ہوئے ایرانی عوام سے اظہار یکجہتی کیا۔ جبکہ ایران کے جوابی حملوں سے دشمن کے دانت کھٹے کرنے کو ایران کے لیے فتح مبین قرار دیا۔ وفد میں شیعہ علماء کونسل پاکستان کے مرکزی نائب صدر علامہ عارف حسین واحدی، مرکزی سیکرٹری جنرل ڈاکٹر شبیر حسن میثمی، ڈپٹی سیکرٹری سکندر عباس گیلانی, اور مرکزی سیکرٹری اطلاعات زاہد علی آخونزادہ شامل تھے۔ قائد ملت جعفریہ پاکستان علامہ سید ساجد علی نقوی دامت برکاتہ نے ایرانی سفیر سے ہر دو حملوں کے نتیجے میں بے گناہ انسانی جانوں کے ضیاع پر تعزیت پیش کرتے ہوئے اسرائیل اور اس کے پشت پناہ امریکہ کے حملوں کو عالمی قوانین کے منافی اور ایک خودمختار ملک کے خلاف ننگی جارحیت قرار دیا اور ایران کی جانب سے کامیاب دفاع و جوابی کارروائی میں دشمن کے دانت کھٹے کرنے کو ایران کے لیے فتح مبین قرار دیا۔
انہوں نے کہا کہ آج انقلاب اسلامی جمہوریہ ایران دوسری بار سرخرو ہوا اور اس امتحان میں رہبر معظم حضرت آیت اللہ سید علی خامنہ ای دامت برکاتہ کا مرتبہ بابصیرت بلند وبالا اور حکمت و دانشمند عالمی رہنماء کے طور پر منظر عام پر آیا جبکہ ان کے بقول اس جنگ نے اسلامی جمہوریہ ایران سے متعلق اپنوں اور پرایوں کی تمام غلط فہمیاں بھی دور کر دیں۔ انہوں نے کہا کہ دنیا پر مظلوم فلسطینیوں کے قتل عام میں اسرائیل کے اصل پشت پناہ امریکہ کا چہرہ بے نقاب ہو چکا ہے اور دنیا کے مختلف ممالک کے خلاف ٹرمپ کے حالیہ جارحانہ اقدامات سے واضح ہو گیا ہے کہ ٹرمپ اپنی آمرانہ اور سامراجی سوچ کے ذریعے دنیا کو اپنا محکوم بنانا چاہتا ہے اور اسی خبط الحواسی میں وہ دنیا کو عالمی جنگ کی آگ میں جھونک رہا ہے جو قابل مذمت ہے۔
انہوں نے دعا کی کہ اسلامی ممالک سامراجی قوتوں کے چنگل سے نکل کر دین اسلام کے احیاء کے لیے ایران کا ساتھ دیں۔ جبکہ قائد ملت جعفریہ علامہ سید ساجد علی نقوی نے اسلامی جمہوریہ ایران کی عوام کو اسلامی جمہوریہ پاکستان کی عوام کی جانب سے مکمل یکجہتی کا یقین دلاتے ہوئے رہبر معظم حضرت آیت اللہ العظمی سید علی خامنہ ای دامت برکاتہ کی صحت و سلامتی کے لیے دعا فرمائی اور دنیا میں امن کے قیام کے لیے ان کے صبر و تحمل کے عملی اقدامات کو خراج تحسین پیش کیا۔ اس موقع پر شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی نے سفیر ایران رضا امیری مقدم اور نمائندہ ولی فقیہ قائد ملت جعفریہ پاکستان علامہ سید ساجد علی نقوی دامت برکاتہ کو پاکستانی عوام کی جانب سے فتح مبین پر پھولوں کے گلدستے پیش کیے۔ دریں اثناء ایرانی سفیر آقائ رضا امیری مقدم نے قائد ملت جعفریہ علامہ سید ساجد علی نقوی دامت برکاتہ اور شیعہ علماء کونسل پاکستان کے اعلی سطحی وفد کا شکریہ اداء کیا اور کہا کہ ایران نے ہمیشہ مظلوم فلسطینیوں سمیت مظلومین جہاں کے حقوق کی اخلاقی، سفارتی اور سیاسی حمایت کی اور اس پاداش میں بڑے نقصانات اٹھانے کے باوجود عالمی سامراج کی آنکھوں میں آنکھیں ڈال کے بلاخوف صدائے حق بلند کی۔
یہی وجہ ہے کہ اسرائیل اور اس کے اصل پشت پناہ امریکہ کا فلسطین اور دیگر اسلامی ممالک کے خلاف ظالمانہ اور سفاکانہ چہرہ دنیا پر آشکار ہوا۔ انہوں کہا کہ ایرانی حکومت اور عوام کے ہر دو ممالک کی جانب سے حملوں کے باوجود حوصلے بلند ہیں اور ایران کسی جارحیت پر خاموش نہیں بیٹھے گا۔ انہوں نے پاکستانی حکومت، عوام اور میڈیا کا بے حد شکریہ ادا کیا جنہوں نے عالم اسلام پر ہر مشکل گھڑی میں ساتھ دیا اور بڑھ کر مظلوم فلسطینیوں سمیت مظلومین جہان کے لیے آواز بلند کی۔ آخر میں قائد ملت جعفریہ علامہ سید ساجد علی نقوی نے پاکستان اور ایران کی کامیابی و کامرانی سرفرازی کے لیے دعا بھی فرمائی۔