ہم ذکر حسین ؑ سے فکر حسینؑ کو بندوق کی نوک سے نہیں بلکہ پیار محبت سے امت محمدی تک پہنچانا چاہتے ہیں

جعفریہ پریس- متولیان و بانیان مجالس اور عمائدین سے خطاب کرتے ہوئے شیعہ علما کونسل خیبرپختونخواہ کے صوبائی صدرعلامہ محمد رمضان توقیر نے کہا کہ محرم اور صفر میں نواسہ رسولﷺ اور ثانی زہرہ ؑ نے درخت اسلام کی ایسی آبیاری کی کہ قیامت تک کوئی بھی یزید وقت اسلام کو نقصان نہیں پہنچا سکتا۔
ڈیرہ اسماعیل خان میں تھلہ حیدر شاہ شیرازی میں منعقدہ اہم اجلاس منعقد ہوا جس میں صدر تھلہ داران سید قتیل اظہر خطیب مسجد لاٹو فقیر سید غضنفر عباس تمام تھلوں کے متولیان وبانیان مجالس کی کثیر تعداد نے شرکت کی۔
اس موقع پر شیعہ علماکونسل خیبرپختونخواہ کے صوبائی صدرعلامہ محمد رمضان توقیر نے خطاب کرتے ہوئے کہا کہ عزاداری سید الشہداء دین خدا کی بقا کی ضامن ہےاور اس سے ہر دور کے ظالم کی مخالفت اور مظلوموں کی حمایت کا درس ملتا ہے۔ ان ایام میں کردار حسینی ؑ کی عظمت اور رفعت وبلندی اور کردار یزید کی ذلت و پستی کی گلی کوچوں اور شاہراؤں پر تشہیر کرنے کا بہترین موقع ہے۔ ایسے میں ہمارے خطباء و واعظین اور ذاکرین سا نحہ کربلا کو حقیقی معرفت کے ساتھ اجاگر کرکے دین مبین اسلام اور مکتب حسینؑ کی بہترین خدمت کا فریضہ انجام دے سکتے ہیں ۔
انہوں نے اپنے خطاب میں مزید کہا کہ پاکستان میں رہنے والے ہر مسلک کے پروگرام کو تحفظ دینا اورہمارے عزاداری پروگرامات کو تحفظ دینا انتظامیہ کی ذمہ داری ہے۔ انہوں نے متولی اور بانی حضرات سے  حتی الا مکان انتظامیہ سے تعاون کرنے کی بھی اپیل کی اورتمام مسالک کے علماء تاجر برادی سے بہتر رابطہ رکھنے کی تا کید کی۔ علامہ محمد رمضان توقیر نے کہا کہ ہم ذکر حسین ؑ سے فکر حسینؑ کو بندوق کی نوک سے نہیں بلکہ پیار محبت سے امت محمدی تک پہنچانا چاہتے ہیں۔