اسلام آباد، 25 دسمبر 2025ء:
قائد ملت جعفریہ پاکستان آیت اللہ سید ساجد علی نقوی نے حضرت عیسیٰ علیہ السلام کی آمد کی خوشی پر پوری انسانیت خصوصاً مسیحی برادری کو کرسمس کے موقع پر خصوصی مبارکباد پیش کی۔ انہوں نے کہا کہ مسیحی برادری نے ملک کی تشکیل، ترقی اور خوشحالی میں ہمیشہ ایک اہم اور کلیدی کردار ادا کیا ہے، جسے فراموش نہیں کیا جا سکتا۔
قائد ملت جعفریہ پاکستان نے مزید کہا کہ قائد اعظم محمد علی جناحؒ کے پاکستان کے لیے پوری قوم کو متحد ہوکر پرامن جدوجہد کرنا ہوگی، اور قائد کے افکار و تعلیمات پر عمل پیرا ہوکر ہی پاکستان کے مستقبل کو محفوظ بنایا جا سکتا ہے۔
آیت اللہ سید ساجد علی نقوی نے کہا کہ حضرت عیسیٰ علیہ السلام کی آمد کا پیغام ہر انسان کے لیے فلاح، آفاقی امن اور ہمدردی کا سبق ہے، جو آخری نبی حضرت محمد ﷺ کی مکمل تعلیمات کے ساتھ پایہ تکمیل کو پہنچا۔ انہوں نے زور دیا کہ حضرت عیسیٰ علیہ السلام کی تعلیمات کے مطابق زندگی استوار کرنا، ان کی سیرت اور کردار سے رہنمائی لینا بھی ایمانی تقاضا ہے۔
قائد ملت جعفریہ پاکستان نے کہا کہ مذہبی تہوار اور کرسمس کا جشن انسانیت کے لیے اتحاد، محبت اور بھائی چارے کا موقع ہے، اور پاکستان میں تمام اقلیتوں کو خوشحال اور محفوظ ماحول فراہم کرنا ریاست کی ذمہ داری ہے۔