آئین،قانون و معاشرتی دائرے میں احتجاج سب کا حق ہے قائد ملت جعفریہ

 آئین،قانون و معاشرتی دائرے میں احتجاج، مارچ بلا تفریق سب کا حق ہے ، قائد ملت جعفریہ پاکستان علامہ ساجد نقوی
خاتون جنت کی سیرت سے استفادہ کیا جانا چاہیے ، قائد ملت جعفریہ پاکستان کا عالمی یوم خواتین پر پیغام
جس جرأت و بہادری سے فلسطین لبنان و کشمیرکی خواتین ظالمو ں کیخلاف ڈٹی رہیں وہ بھی ایک مثال ہے
  راولپنڈی /اسلام آباد 07 مارچ 2025ء (    جعفریہ پریس پاکستان         ) قائد ملت جعفریہ پاکستان علامہ سید ساجد علی نقوی کہتے ہیں مارچ، احتجاج، حقوق کیلئے آواز بلند کرنا سب کا حق ہے جو سلب نہیں کیا جاسکتا البتہ آئین، قانون اور معاشرتی اقدارکو ملحوظ خاطر رکھنا ضروری ہے۔

خاتون جنگ کے چھوڑے ہوئے نقوش سے استفادہ کرناچاہیے،جس جرأت و بہادری سے فلسطین، لبنان و کشمیر کی خواتین ظالموں کیخلاف ڈٹی رہیں وہ بھی ایک مثال ہے۔

عالمی یوم خواتین پر اپنے پیغام اور ملک کے مجموعی حالات، خواتین کو درپیش مسائل پرقائد ملت جعفریہ پاکستان علامہ سید ساجد علی نقوی نے کہاکہ مارچ ، احتجاج، حقوق کیلئے آواز بلند کرنے کا حق نہ صرف آئین پاکستان نے ہر کو فرد دیا ہے بلکہ بین الاقوامی قوانین اور تمام مہذب معاشروں میں بھی ایسی کوئی قدغن نہیں البتہ ہر معاشرے ، سماج کے اپنے اصول، اپنی حدود ، اپنی روایات و اقدار ہیں جنہیں مدنظر رکھا جانا ضروری ہے۔

جہاں تک عالمی یوم خواتین سے متعلق چارٹرڈ آف ڈیمانڈ ہے ان میں بعض غیر ضروری ہیں اوربعض ایسے مطالبات ہیں جنہیں غیر ضروری یا غیر اہم نہیں قرار دیا جاسکتا جہاں تک شہری آزادیوں کا معاملہ ہے ہم ان بے جا پابندیوں کیلئے آواز اٹھاتے چلے آرہے ہیں البتہ جس طرح کی سوشل میڈیا پوسٹس، بینرز منظر عام پر آتے رہے ہیں وہ معاشرتی روایات اور شہری آزادیوں سے متصاد م ہوتے ہیں جس میں اصلاح کی ضرورت ہے کیونکہ انتہاء پسندی جس بھی شکل میں ہو وہ معاشرے میں اصلاح کی بجائے بگاڑ پیدا کرتی ہے اور قابل مذمت ہے۔

اس موقع پر انہوں نے مظلوم فلسطین خصوصاً غزہ اور ہمسائیہ ملک بھارت میں مسلم خواتین کے ساتھ ہونے والے ناروا سلوک ، کشمیر میں خواتین کے ساتھ ہونے والی ظلم و زیادتی پر بھی شدید تشویش کا اظہار کرتے ہوئے کہاکہ پوری عالم انسانیت خصوصاً تمام خواتین کو کشمیر و فلسطین و لبنان کی مظلوم خواتین کیساتھ بھی آج کے روز اظہار یکجہتی کرتے ہوئے ان جرأت مند مائوں، بہنوں اور بیٹیوں کو خراج تحسین پیش کرنا چاہیے جو تمام مظالم سہنے کے باوجود آج بھی ظلم و جبر کے سامنے ڈٹی ہوئی ہیں۔