افغانی حکومت اپنے شہریوں کے تحفظ کو یقینی بنانے کےلئے موثر اقدامات کریں تاکہ شہریوں کا تحفظ ممکن ہو ،قائد ملت جعفریہ
اسلام خود کش حملو ں کی اجازت نہیں دیتا اور پاکستانی عوام دکھ کی اس گھڑی میں افغانی بھائیوں کے ساتھ ہیں
اسلام آباد /راولپنڈی 21اکتوبر 2017ء ( دفتر قائد )قائد ملت جعفریہ پاکستان علامہ سیدساجد علی نقوی نے گزشتہ روز افغانستان کی دو مساجد پر خودکش حملوںمیں کم از کم 60 نمازیوںکی شہادت کی شدید الفاظ میں مذمت اور نمازیوں کی قیمتی جانوں کے ضیاع پر گہرے دکھ اور افسوس کا اظہار کرتے ہوئے افغانی حکومت سے مطالبہ کیا ہے کہ وہ اپنے شہریوں کے تحفظ کو یقینی بنانے کےلئے موثر اقدامات کریں تاکہ شہریوں کا تحفظ ممکن ہو ۔ علامہ ساجد نقوی کا کہنا تھا کہ اس سے قبل بھی بیس اگست کو کابل میں نمازیوں پر ہونے والے ایک حملے میں 20 نمازی شہید ہو گئے تھے۔اُس وقت بھی حملے کی ذمہ داری ایک گروہ نے قبو ل کی تھی اور اس واقع کی ذمہ داری بھی اسی گروہ نے قبول کی ہے افغان حکومت کو چاہیے کہ خود کش حملوں میں ملوث اس گروہ کے خلاف وہ اپنے قوانین کے مطابق کارروائی کرتے ہوئے حملہ آوروں اور کے سرپرستوں کو قانون کے شکنجہ میں لیکر قرار واقع سزا دئے ۔ علامہ ساجد نقوی کا مزید کہنا تھا کہ مساجد پر خودکش حملے ایک بزدلانہ کارروائی ہےاسلام خود کش حملو ں کی اجازت نہیں دیتا اور یہ حملے انسانیت کے خلاف ہیں۔ پاکستانی عوام دکھ کی اس گھڑی میں افغانی بھائیوں کے ساتھ ہیں ۔