اقتصادی راہداری اور سی پیک ملک کی ترقی کی ضامن منصوبے ہیں متنازعہ بنانے سے گریز کیا جائےقائد ملت جعفریہ پاکستان

قائد ملت جعفریہ پاکستان علامہ سید ساجد علی نقوی نے کہا کہ اقتصادی راہداری اور سی پیک ملک کی ترقی کی ضامن منصوبے ہیں متنازعہ بنانے سے گریز کیا جائے ۔ان خیالات کا اظہار انہوں نے مختلف وفود سے گفتگو کرتے ہوئے کیا جنہوں نے قائدملت جعفریہ پاکستان سے انکی رہائش گاہ پر ملاقات کی ۔علامہ سید ساجد علی نقوی کاکہنا تھا کہ اقتصادی راہداری منصوبہ اور سی پیک کی تکمیل نہ صرف پاکستان بلکہ خطے کی ترقی کے لئے سنگ میل کی حیثیت رکھتا ہے اور اس سے جہاں عام آدمی کا معیار زندگی بلند ہو گا وہیں خطے اور خصوصاجنوبی ایشاء میں ترقی کی نئی راہیں کھلیں گی ۔ان کا مزید کہنا تھا کہ ہم اس جانب توجہ دلا تے رہے ہیں کہ پاکستان کو اپنے غیر معمولی محل وقوع کی وجہ سے فائدہ اُٹھانا چاہیے اورایسی پالیساں مرتب کرنی چاہیں جس سے ملکی ترقی کی نئی راہیں کھلیں۔علامہ ساجد نقوی کاکہنا تھا کہ اقتصادی راہداری اور سی پیک پر تمام سیاسی جماعتوں کا متفق ہو نا خوش آئند ہے لہذامغربی اور مشرقی روٹ کے حوالے سے حکومت کو خد شات دور کرتے ہوئے اتفاق رائے کو مضبوط کرنے کیلئے عملی اقدامات اُٹھانے چاہییں۔