امام حضرت علی نقی ؑ کے یوم ولادت کے موقع قائد ملت جعفریہ پاکستان کا پیغام

راولپنڈی/ اسلا م آباد 4 جولائی2023 ء (جعفریہ پریس پاکستان   )قائد ملت جعفریہ پاکستان علامہ سید ساجد علی نقوی نے امام دہم امام علی نقی ؑ کے یوم ولادت(15 ذی الحجہ) کے موقع پر کہا کہ امام ہادی‘ نجیب‘ مرتضی ‘ نقی‘ عالم‘ فقیہ‘ امین اور طیب جیسے مشہور القابات کے حامل کی کنیت ابو الحسن ثالث معروف ہے۔ متعدد موضوعات پر آپؑ سے متعدد احادیث منقول ہیں۔ جن کا زیادہ حصہ اہم کلامی موضوعات پر مشتمل ہے۔ زیارت جامعہ کبیرہ جو حقیقت میں امامت سے متعلق عمدہ مسائل اور امام شناسی کا ایک مکمل دورہ ہے، آپ ہی کی یادگار ہے۔امامت کے دوران مختلف علاقوں میں نمائندگان کا تعین کر کے اپنے پیروکاوں سے رابطے میں رہے اور انہی وکلاء کے ذریعے عوام کے مسائل کو بھی حل و فصل کیا کرتے تھے۔ آپؑ کے شاگردوں میں متعدد شخصیات شامل ہیں۔
علامہ ساجد نقوی کے مطابق متوکل کے بر سر اقتدار آتے ہی تنگ نظریوں کا آغاز ہوا اور مخالفین کی سرکوبی شروع کردی اوریہ سلسلہ شدت کے ساتھ جاری رہا۔ امامؑ کا ہم عصر حکمرانوں کے درمیان بڑا فاصلہ حائل ہوچکا تھا اور آپ ؑ گھٹن کے اس دور میں اعلیٰ و ارفع اہداف کے لئے کوشش کر رہے تھے اور اللہ کی عنایت خاصہ سے اس عجیب طوفان اور مبہم صورت حال میں کشتی ہدایت کو ساحل تک پہنچانے میں کامیاب ہوئے اور اسلامی معارف و تعلیمات کی نشر و اشاعت میں فیصلہ کن کردار ادا کیا۔ حقیقت یہ ہے کہ اگر آج امام ہادیؑ کے گرانقدر آثار ہمارے درمیان موجود ہیں تو یہ اس تصور کے بطلان کی دلیل ہے۔ جو روشیں امام اسلامی تعلیمات کیلئے بروئے کار لارہے تھے وہ منفرد اور اپنی مثال آپ تھیں۔غالیوں کی سرگرمیوں کی وجہ سے انحرافات نے مکتب کو یلغار کا نشانہ بنانا شروع کیا تو امام نے تحریف قرآن سمیت تمام انحرافات کا بھرپور مقابلہ کیا ۔
 امام علی نقی الہادی ؑ نے انفرادی اور ذاتی زندگی میں انسانوں کی رہنمائی فرمائی وہاں اجتماعی طرز زندگی اور حکمرانی جیسے معاملات میں بھی لوگوں کو ان کی ذمہ داریوں سے آگاہ کیا اسی لئے آپ کا کردار آج بھی دنیا کے ہر انسان اور ہر معاشرے کے لئے مشعل راہ ہے اور نمونہ عمل ہے