تازه خبریں

ایران و مغربی ممالک میں ہونیوالا معاہدہ خوش آئند ہے، قائد ملت جعفریہ پاکستان

جعفریہ پریس۔  قائد ملت جعفریہ پاکستان حضرت آیت اللہ علامہ سید ساجد علی نقوی نے ایران اور مغربی ممالک میں ہونیوالے معاہدے کو خوش آئند قراردیتے ہوئے کہا ہے کہ معاہدے سے نہ صرف ایران و مغربی ممالک میں جاری تناﺅ کا خاتمہ ہوگا بلکہ اس کے خطے پر مثبت اثرات کے ساتھ ساتھ اسلامی ممالک کے اتحاد کےلئے موثرعمل ثابت ہوگا ۔
ان خیالات کا اظہار انہوں نے 12سال کے طویل عرصہ کے بعد مغربی ممالک اور برادر ہمسایہ ملک ایران میں ہونیوالے حالیہ معاہدے پر اپنے رد عمل میں کیا۔ قائد ملت جعفریہ پاکستان نے کہا کہ اس معاہدے سے یہ بات ثابت ہوگئی کہ ہمیشہ مسائل مذاکرات کے ذریعے ہی حل ہوتے ہیں اور طاقت کا استعمال یا پابندیاں کسی مسئلے کا حل نہیں ہوتیں۔ انہوں نے اس معاملے کو دیرآید درست آید کا مصداق قرار دیتے ہوئے کہا کہ اس معاہدے سے جہاں ایک طرف ایران کی اقتصادی مشکلات کا خاتمہ ہوگا وہیں ایران و مغربی ممالک میں جاری تناﺅ کا خاتمہ ہونے میں بھی مدد ملے گی۔ حضرت آیت اللہ علامہ سید ساجد علی نقوی نے کہا کہ اس معاہدے سے خطے پر بھی مثبت اثرات مرتب ہونگے اور اسلامی ممالک کے اتحاد میں بھی اہم پیش رفت ہوگی۔ انہوں نے کہاکہ اس نئی صورتحال میں پاکستان کو بھی اپنا کردار ادا کرناچاہیے اور اسلامی ممالک کو آپس میں متحد کرنے اور باہمی معاملات افہام و تفہیم سے حل کرانے کےلئے کردار ادا کرنا چاہیے۔
قائد ملت جعفریہ پاکستان حضرت آیت اللہ علامہ سید ساجد علی نقوی نے مزید کہا کہ امید ہے اب پاک ایران گیس پائپ لائن معاہدے میں حائل ہونیوالی رکاوٹیں بھی دور ہونگی ۔ حکومت کو چاہیے وہ اس معاملے پر سنجیدگی سے غور کرتے ہوئے فی الفور عملی اقدامات اٹھائے تاکہ ملک سے توانائی بحران کا خاتمہ ہوسکے ۔