ایران پر نئی پابندیاں عالمی دہرے معیار کی واضح دلیل ہے قائد ملت جعفریہ پاکستان

 استعماریت کی نئی پابندیوں کااعلان عالمی دہرے معیار کی مزید واضح دلیل، علامہ سید ساجد نقوی
 ایران پر حق دفاع کے باوجود پابندیاں اور غزہ میں نہتے فلسطینیوں کی نسل کشی کے باوجود اسرائیل کو چھوٹ استعماریت، ظلم، ناانصافی اوردوغلے پن کی عکاس،قائد ملت جعفریہ پاکستان
 اسلام آباد 18 اپریل 2024ء ( جعفریہ پریس پاکستان ) قائد ملت جعفریہ پاکستان علامہ سید ساجد علی نقوی نے کہاکہ مسلسل عالمی دہرا معیار دنیا کے امن کےلئے خطرہ بنتا جارہاہے، ایک طرف حق دفاع پر بھی اعتراضات اور دوسری طر ف نسل کشی کی کھلی چھوٹ اس عالمی نا انصافی، ظلم اور دوغلے پن کی عکاس کیساتھ بین الاقوامی دنیا کو مسلسل بدامنی ، افراتفری اور بڑی جنگ کی جانب دھکیلنے کے مترادف ہے ، ایران پرحق دفاع کے باوجود استعماریت کی نئی پابندیوں کا اعلان اورغزہ میں قتل عام کے باوجو د قابض صیہونی مافیہ کو تھپکی اس کی واضح مثال ہے۔
ان خیالات کا اظہارقائد ملت جعفریہ پاکستان علامہ سید ساجد علی نقوی نے استعمار کی جانب سے برادر ہمسائیہ ملک پر نئی پابندیوں کے اعلان پر اپنے رد عمل میں کیا۔ علامہ سید ساجد علی نقوی نے کہاکہ 7اکتوبر2023ءکے بعد سے آج تک کونسا ایسا ظلم ایساہتھکنڈا قابض صیہونیت و استعماریت نے غزہ، رفاہ سمیت پورے فلسطین پرنہیں آزمایایا ہمسائیہ ممالک پربین الاقوامی قوانین و اقوام متحدہ کی چارٹرڈ کی کونسی خلاف ورزی ہے جو نہیں کی گئی اور حملے کئے گئے اس پر عالمی استعمار نہ صرف خاموش تماشائی بلکہ دراصل اس ظلم میں شریک کار اور پشتی بان کے طور پر شامل ہے جبکہ دوسری طرف ایک مسلم ریاست اپنے حق دفاع کے طور پر تمام بین الاقوامی قوانین اور اقوام متحدہ کے چارٹرکو مدنظر رکھ کر جواب دے تو وہ بھی اس ظالم ، جابر ، قابض عالمی استعماریت کو ناگوار گزرے اور پابندیوں کا اعلان کردیا جائے تو اس سے بڑھ کر اور کیا دہرا معیار ہوگاافسوس اقوام متحدہ جسے اقوام عالم کے امن کےلئے دوٹوک، واضح اور جرات مندانہ اقدام اٹھانا چاہئیے تھا وہ اپنی ہی سلامتی کونسل کی قرارداد تک پر عملدرآمد سے قاصر ہے اور اسی دہرے معیار کے سبب بین الاقوامی دنیا کا امن نہ صرف داﺅ پر لگ رہاہے بلکہ دنیا تیزی سے مسلسل بد امنی، افراتفری اور بڑی جنگ کی جانب دھکیلی جارہی ہے ۔انہوں نے مزید کہاکہ یہ صورتحال عالمی امن کے خواہاں مہذب اقوام و ممالک ، اسلامی دنیا اور بالخصوص پاکستان بھی کےلئے انتہائی تشویشناک ہے کیونکہ پاکستان کی بنیادی ذمہ داریو ؒ ؒں اور اساس مسئلہ فلسطین و کشمیر ہیں ۔