بچو ں سے مشقت معاشرتی برائیوں میں سب سے بُر ا فعل ہے، قائد ملت جعفریہ پاکستان

بچو ں سے مشقت معاشرتی برائیوں میں سب سے بُر ا فعل ہے، قائد ملت جعفریہ پاکستان علامہ ساجد نقوی
 چائلڈ لیبر میں آئے روز اضافہ کی بنیادی وجہ استحصالی و غیر منصفانہ معاشی و انتظامی نظام ہے،قائد ملت جعفریہ پاکستان
ریاست پاکستان کو مستقبل کے معماروں کیلئے قانون سازی کے ساتھ ساتھ تربیت و تعلیم اور روشن مستقبل کیلئے اقدامات اٹھانا ہونگے

راولپنڈی / اسلام آباد11جون 2024ء (      جعفریہ پریس پاکستان       ) قائد ملت جعفریہ پاکستان علامہ سید ساجد علی نقوی کہتے ہیں معاشرتی برائیوں بچوں سے مشقت بڑی برائیوں میں شامل ہے، افسوس استحصالی معاشی نظام اور غیر مساوی وسائل کے باعث نان شبینہ سے محروم افراد میں اضافے کے ساتھ ساتھ دنیا میں چائلڈ لیبرمیں بھی اضافہ ہوتا جارہاہے، اسلام کا حسن ہے کہ اس نے مرد و زن، بزرگ شہریوں کے ساتھ بچوں کے حقوق پربھی زور دینے کے ساتھ لائحہ عمل دیا ہے ، مستقبل کے معماروں کیلئے قانون سازی کے ساتھ ساتھ تربیت و تعلیم اور روشن مستقبل کیلئے اقدامات اٹھانا ہونگے۔ان خیالات کا اظہار انہوںنے بین الاقوامی چلڈرن لیبر ڈے(بچوں سے مشقت کے انسداد کے دن)پر پیغام میں کیا۔ قائد ملت جعفریہ پاکستان علامہ سید ساجد علی نقوی نے کہاکہ معاشرے میں دیگر برائیوں کے ساتھ بچوں سے مشقت بھی بڑی برائیوں میں شامل ہے جس کی بنیاد استحصالی معاشی نظام اور عدم مساواتی وسائل ہیں جس کے باعث ایک جانب غربت بڑھ رہی ہے، نان شبینہ سے محروم افراد میں اضافہ ہورہاہے تو اسی باعث دن بدن دنیا بھر کی طرح پاکستان میں بھی ہر آنے والے سال میں چائلڈ لیبرمیں اضافہ ہوتا جارہاہے، اقوام متحدہ کے گزشتہ سالوں کے اعدادو شمار کے مطابق اس وقت تک دنیا میں 160 ملین سے زائد بچے جبری مشقت پر مجبور ہیں۔انہوںنے کہاکہ اقوام متحدہ سمیت طاقت ور اداروں اور ملکو ں اس غیر مساویانہ معاشی تقسیم کا حل نکالنا ہوگا۔ انہوں نے پاکستان کی صورتحال پر تبصرہ کرتے ہوئے کہاکہ بچوں کے حقوق کیلئے قانون سازی کے ساتھ عملی طور پر غریب، نادا ر اور یتیم بچوں کی کفالت کیلئے تربیت و تعلیم کیلئے  اقدامات اٹھانا ہونگے ۔ پاکستان کے حالیہ معاشی حالات کے باعث غریب طبقہ انتہائی مشکل صورتحال کا شکار ہے ایسے میں وہ بچوں کی تربیت و تعلیم کے وسائل ہی نہیں رکھتا ۔ قائد ملت جعفریہ پاکستان نے اسلام کے معاشی و معاشرتی نظام کی طرف توجہ دلاتے ہوئے کہاکہ اسلام نے مرد و زن ، بزرگ شہریوں کے ساتھ بچوں کے حقوق پر بھی زور دینے کے ساتھ لائحہ عمل بھی دیاجبکہ بچوں کی مشقت کی بھی اسلام نے سختی سے ممانعت کی ہے ۔