جے ایس او پاکستان ایک ایسی نرسری ہے کہ جو قوم کوپڑھا لکھا اور تربیت یافتہ نوجوان دے گی ،علامہ عارف واحدی

جعفریہ پریس – جے ایس او پاکستان راولپنڈی ڈویژن کے صدر عبداللہ رضا نے آج شیعہ علماء کونسل پاکستان کے مرکزی آفس میں شیعہ علماء کونسل پاکستان کے مرکزی سیکرٹری جنرل علامہ عارف واحدی صاحب سے ملاقات کی۔ ملاقات میں جے ایس او پاکستان راولپنڈی ڈویژن کے صدر عبداللہ رضا نے علامہ عارف واحدی صاحب کو بلا مقابلہ سیکرٹری جنرل منتخب ہونے پر مبارک دی۔
اس موقع پر شیعہ علماء کونسل کے مرکزی سیکرٹری جنرل علامہ عارف واحدی صاحب کا کہناتھا کہ جے ایس او پاکستان کے نوجوان ہمارا اثاثہ ہیں۔ اور یہ وہ نرسری ہے کہ جہاں سے تربیت یافتہ نوجوان پیدا ہوں گے جنہوں نے کل ملک و قوم کی باگ ڈور سنبھالنی ہے۔ آپ طلبہ کی تربیت پر توجہ مرکوز رکھیں ۔ اس سلسلے میں آپ کو جس قسم کی مدد کی ضرورت ہو گی ہم حتی المقدور آپ کے ساتھ تعاون کریں گے۔ ان کا کہنا تھا کہ آپ تربیتی دروس، کوئز پروگرامات، لیکچرزاور دیگر نصابی سرگرمیوں پر اپنی توجہات کو مرکوز کریں۔
ان کا کہنا تھا کہ ماہ شعبان شروع ہو چکا ہے۔ یہ مہینہ اپنے آپ کو تیار کرنے کا ہے۔ آگے ماہ صیام آ رہا ہے، ماہ صیام کہ جو ماہ خدا ہے۔ اس مہینہ میں انسان اپنے نفس کو گناہوں سے بچانے کی تمرین کرتا ہے۔ ماہ شعبان میں اپنے آپ کو اس تمرین کے لیے آمادہ و تیار کریں۔ اور دنیاوی تربیت کے ساتھ ساتھ اخروی تربیت پر توجہ مرکوز کریں۔ جے ایس او کا نوجوان ہر لحاظ سے ایک مکمل نوجوان ہونا چاہیے۔
جے ایس او پاکستان راولپنڈی ڈویژن کے صدر برادر عبداللہ رضا نے مرکزی سیکرٹری جنرل علامہ عارف واحدی صاحب کو اپنی کارکردگی رپورٹ پیش کی اور ماہ شعبان کے حوالے سے ہونے والی پیش رفت کو بیان کیا۔ جس پر علامہ عارف واحدی صاحب نے ان کی کارکردگی کو سراہتے ہوئے مزید مفید مشورے دیے۔