حضرت سید حسن نصراللہ وقار کے عروج پر ہیں آیت اللہ خامنہ ای

رہبر انقلاب اسلامی آیت اللہ العظمی سید علی خامنہ ای نے اپنے اس پیغام میں شہید سید حسن نصراللہ اور شہید سید ہاشم صفی الدین کی مجاہدتوں کی قدردانی کی اور فرمایا کہ دشمن جان لے کہ غاصبانہ قبضے، ظلم اور استکبار کے خلاف استقامت ختم ہونے والی نہیں اور خدا کے ارادے کے مطابق، منزل مقصود تک پہنچنے تک استقامت کا سلسلہ جاری رہے گا۔

عراق میں رہبر انقلاب اسلامی کے نمائندے اور رہبر انقلاب اسلامی کی جانب سے لبنان بھیجے گئے وفد کے رکن حجت الاسلام و المسلمین سید مجتبی حسینی نے یہ پیغام حزب اللہ کے شہید رہنماؤں کی تشییع سے پہلے پڑھ کر سنایا۔  رہبر انقلاب اسلامی آیت اللہ العظمی سید علی خامنہ ای کے پیغام کا متن:

بسم الله الرّحمن الرّحیم

قال الله عزّ و جل: وَ لِلّٰهِ العِزَّةُ وَ لِرَسولِهِ وَ لِلمُؤمِنینَ وَ لٰکِنَّ المُنافِقینَ لا یَعلَمون.

عظیم مجاہد اور علاقے میں استقامتی محاذ کے متحرک زعیم و پیشوا، حضرت سید حسن نصراللہ (اعلی اللہ مقامہ) اس وقت عزت و وقار کے عروج پر ہیں۔ ان کا پاکیزہ جسم جہاد فی سبیل اللہ کی سرزمین میں سپرد خاک کیا جائے گا، لیکن ان کی روح اور ان کا راستہ پہلے سے کہیں زیادہ سرفراز ہوکر جلوہ نما ہوگا اور اس راستے پر چلنے والوں کی رہنمائی کرتا رہے گا۔ دشمن جان لے کہ غصب، ظلم اور استکبار کے سامنے استقامت ختم ہونے والی نہیں اور یہ سلسلہ خدا کے حکم سے منزل مقصود تک پہنچ کر رہے گا۔ جناب سید ہاشم صفی الدین کا نیک نام اور نورانی چہرہ بھی علاقے کی تاریخ میں ایک چمکتے ستارے کی طرح روشنی بکھیرتا رہے گا جو لبنان میں استقامت کے رہنما کے قریبی ساتھی اور اٹوٹ جز تھے۔ خدا اور اس کے صالح بندوں کا سلام ہو ان دو سرفراز اور دیگر ایثار اور شجاعت کے جذبے سے مالامال مجاہدوں پر جنہوں نے گزشتہ دنوں جام شہادت نوش کیا۔ سلام ہو تمام شہدائے اسلام پر۔ اور میرا خصوصی سلام ہو تم پر اے میرے عزیز فرزندو!  لبنان کے دلیر نوجوانو!