روز مواخات پر قائد ملت جعفریہ پاکستان کا پیغام جاری

تمام مکاتب و مسالک کے مقدسات کا احترام لازم اور توہین ممنوع ہے، ساجد نقوی
باہمی محبت و رواداری کو فروغ دے کر’نفرتوں’ بغض و عناد اور عداوتوں کا خاتمہ کرکے وحدت کا عملی مظاہرہ کیا جائے،قائد ملت جعفریہ
حضور اکرم ۖ  نے یوم مواخات کے موقع پر حضرت علی  کو اپنا بھائی قراردے کر انکی قدر و منزلت کو واضح کیا، یوم مواخات پرپیغام
راولپنڈی/ اسلام آباد۔   12مارچ  2025ء (  جعفریہ پریس پاکستان )قائد ملت جعفریہ پاکستان علامہ سید ساجد علی نقوی  کا12  رمضان المبارک  ”روز مواخات ” کی مناسبت سے کہنا ہے کہ روز مواخات کو یاد رکھتے ہوئے آج ایک بار پھر ”صیغہ اخوت” کی تجدید کی جانی چاہیے اور انصار و مہاجرین والا جذبہ بیدار کرتے ہوئے ایک دوسرے کے دکھ سکھ بانٹے جائیں تاکہ مشکلات اور مصائب کا مقابلہ کیا جاسکے۔ نبی رحمت ۖ  نے انصار و مہاجرین کو آپس میں بھائی بھائی بناکر بھائی چارے کی تشکیل کی اور آئیڈیل معاشرے کی بنا ڈالی اور اس موقع پر حضرت علی ابن ابی طالب کو اپنا بھائی قراردے کر انکی قدر و منزلت کو واضح کیا
علامہ ساجد نقوی مزید کہتے ہیں کہ اتحاد و وحدت اور امت مسلمہ کی یکجہتی کو قرآنی و نبوی فریضہ گردانتے ہوئے ہم نے ایک تاریخی ”اعلامیہ وحدت” پر دستخط کرکے امت مسلمہ کو ایک لڑی میں پرونے میں کوششوں کی بنیاد رکھی۔پھر نفاذ شریعت سفارشات’ اتحاد بین المسلمین کمیٹیاں’ ضابطہ  ہائے اخلاق اور ان سے بھی بڑھ کر  پہلے  ”ملی یکجہتی کونسل پاکستان” کی بنیاد رکھی جس میں ملک کے تمام اسلامی مکاتب و مسالک کی نمائندہ دینی جماعتوں کی بھرپور شرکت تھی اور اس کے بعدسن 2000 ء کے اوائل میں ”متحدہ مجلس عمل پاکستان”  وجود میں آئی ۔
قائد ملت جعفریہ پاکستان نے واضح کیا کہ ہمارے درمیان  بہت سے مشترکا ت ہیں جنہیں اجاگر کرنے کی ضررت ہے اور فروعی نوعیت کے اختلافات کا بیان مہذب انداز میں’ شائستگی کے ساتھ علمی سطح پر کرنے کی عادت ڈالنی چاہیے۔ تمام مکاتب اور مسالک کے مقدسات کا احترام لازم اور توہین ممنوع ہے،ہمارے اسی موقف کی تائید ہمارے بزرگان دین’ مراجع کرام اور آیات عظام نے کی ہے۔ باہمی محبت و رواداری کو فروغ دے کر’نفرتوں’ بغض و عناد اور عداوتوں کا خاتمہ کرکے وحدت کا عملی مظاہرہ کیا جائے ۔