شیعہ علماء کونسل کی جانب سے22رمضان المبارک کوملک بھر میں یوم القدس بھر پور طریقے سے منایا جائیگا

قائدملت جعفریہ کی ہدایت پر اسلام آبا د سمیت ملک بھر کے تمام بڑے اور چھوٹے شہروں میں بعد از نماز جمعہ القدس ریلیاں نکالی جائینگی،علامہ عارف حسین واحدی
حقوق بشرکی تنظیموں اور عالمی ادارو ں کو کیوں اسرائیلی جارحیت نظر نہیں آتی، مرکزی سیکریٹری جنرل شیعہ علماء کونسل پاکستان
راولپنڈی/اسلام آباد 30 جون 2015 ء ( ) شیعہ علماء کونسل پاکستان کے مرکزی سیکریٹری جنرل علامہ عارف حسین واحدی نے کہا کہ ہرسال کی طرح امسال بھی 22رمضان المبارک،10جولائی 2015ء بروز جمعۃالمبارک کوملک بھر میں یوم القدس بھر پور طریقے سے منایا جائیگا۔ قائد ملت جعفریہ پاکستان علامہ سید ساجد علی نقوی کی ہدایت پر چھ دہائیوں سے جاری اسرائیلی جارحیت کیخلاف اور بیت المقدس کی یہودی تسلط سے آزادی کیلئے اسلام آباد سمیت ملک بھر کے تمام بڑے چھوٹے شہروں میں القدس ریلیاں نکالی جائیں گی۔ علامہ عارف حسین واحدی نے مزید کہاکہ اسرائیل نے ظلم و بربریت کے وہ پہاڑ توڑے ہیں جن کی مثالیں ڈھونڈے نہیں ملتیں ،یوم القدس ہرسال کی طرح امسال بھی بھرپور طریقے سے منایا جائے گا اور عالمی سطح پر دباؤ بڑھایا جائیگا کہ مظلوم فلسطینیوں کی حمایت کیلئے کیوں آواز بلند نہیں کی جاتی، کیوں انسانی حقوق کے اداروں کو بشری حقوق کی پامالی نظر نہیں آتی؟، کیوں گلی ، کوچو ں میں معصوم بچوں کا بہتاہوا خون نظر نہیں آتا، کیا خون مسلم اتنا ارزاں ہوگیاہے کہ بین الاقوامی دنیا کی طرح اسلامی دنیا میں بھی شہر خموشاں جیسی بے حسی و خاموشی نظر آرہی ہے ۔ انہوں نے کہاکہ تازہ ترین اطلاعات آرہی ہیں کہ اسرائیل نے جارحیت کی انتہاء کرتے ہوئے طبی امداد کیلئے آنیوالا فلوٹیلا قافلہ بھی روک لیاہے جبکہ اس سے قبل بھی اس طرح کے امداد قافلوں پر حملے کئے گئے ،اسرائیلی جارحیت کے خلاف عالمی اداروں کی یہ خاموشی معنی خیز ہے ۔
علامہ عارف حسین واحدی نے کہاکہ یوم القدس کو بھرپور طریقے سے منانے کیلئے مرکز سمیت صوبائی و ضلعی سطح پر القدس کمیٹیاں قائم کردی گئی ہیں اور اس حوالے سے عوام میں بھی آگاہی مہم تیز کردی گئی ہے۔ انہوں نے حکومت پاکستان سے مطالبہ کیاکہ وہ اسرائیلی جارحیت کے خلاف اقوام متحدہ میں ایک مرتبہ پھر آواز احتجاج بلند کرتے ہوئے اپنے عزم کا اعادہ کرے، انہوں نے کہاکہ القدس ریلیوں میں تمام مکاتب فکر اور سیاسی جماعتوں کے قائدین کو بھی مدعو کیا جائیگا ۔