فرقہ واریت اور ملک میں دہشت گردی پھیلانے والے پاکستان و اسلام کے دشمن ہیں، علامہ عارف حسین واحدی

جعفریہ پریس – شیعہ علماء کونسل پاکستان کے مرکزی سیکرٹری جنرل علامہ عارف حسین واحدی نے کہا ہے کہ فرقہ واریت پھیلانے والے پاکستا ن اوراسلام کے دشمن ہیں، ملکی استحکام اور اُمہ کی سربلندی کیلئے اتحاد ضروری ہے، انتہا پسندی و دہشت گردی کا اسلام سے کوئی تعلق نہیں۔ شیعہ علماء کونسل پاکستان کے مرکزی سیکرٹری جنرل نے ڈیرہ اسماعیل  گوجرانوالہ میں شیعہ ٹارگٹ کلنگ اور کراچی آرام باغ میں صالح مسجد کے باہربم دھماکہ کی شدیدمذمت کرتے ہوئے ریاستی اداروں سے مطالبہ کیا کہ واقعات میں ملوث افراد کا سراغ لگا کرانہیں کیفروکردار تک پہنچایا جائے ۔
علامہ عارف حسین واحدی نے کہا کہ اسلام میں انتہا پسندی اور دہشت گردی کی کوئی گنجائش نہیں اورنہ ہی ان دہشت گردوں کا امن و آشتی کے مذہب سے کوئی تعلق ہے انہوں نے کہا کہ اسلام امن و سلامتی کا مذہب ہے ۔ قائد ملت جعفریہ پاکستان حضرت آیت اللہ علامہ سید ساجد علی نقوی نے ہمیشہ اتحاد و وحدت کا درس دیا اور ہم اسی سلسلے کو آگے بڑھا رہے ہیں کیونکہ ملک کے استحکام اور اسلام کی سربلندی کیلئے اتحاد امت ضروری ہے ۔ انہوں نے کہا کہ فرقہ واریت پھیلانے والے اسلام اور پاکستان دونوں کے دشمن ہیں ۔
ملک کے مختلف شہروں میں ہونے والی شیعہ ٹارگٹ کلنگ کے نتیجہ میں ہونے والے شہداء کے لواحقین سے اظہار تعزیت اورزخمیوں کی صحت یابی کی دعا کرتے ہوئے علامہ عارف حسین واحدی نے کہا کہ ملک و ملت کیلئے شہداء کی قربانیاں رائیگاں نہیں جائیں گی اور شہداء کا خون ایک دن ضرور رنگ لائے گا۔سیکورٹی ادارے عوام کو تحفظ فراہم کرنے میں یکسر ناکام ہوچکے ہیں ،سیکورٹی اداروں کو چاہیے کہ ملک میں بیلنس پالسیی ترک کرکے ملک میں دہشتگردی اور ٹارگٹ کلنگ میں ملوث افراد کو قانون کے شکنجہ میں جکڑے ۔ ہم امن پسند قوم ہیں لیکن ہماری خامو شی کو کمزوری نہ سمجھا جائے نیشنل ایکشن پلان پر عملدرآمد کو تیز کرتے ہوئے ضرب عضب کا دائرہ وسیع کیا جائے اور ان دہشت گردوں کا مکمل صفایا کیا جائے جو ملک و قوم کے دشمن ہیں ان دہشتگردوں کے مکمل خاتمہ تک ملک میں حقیقی معنوں میں امن کا قیام ممکن نہیں۔