قائد ملت جعفریہ پاکستان علامہ سید ساجد علی نقوی کی کال پرملک بھرمیں سانحہ شکارپورکیخلاف احتجاجی مظاہرے

جعفریہ پریس- قائد ملت جعفریہ پاکستان حضرت آیت اللہ علامہ سید ساجد علی نقوی کی کال پراعلان کردہ سہ روزہ سوگ کے آخری دن ملک بھر کے تمام بڑے چھوٹے شہروں جن میں کوئٹہ، کراچی، حیدرآباد، سکھر، شکار پور، ملتان، مظفرگڑھ، جھنگ، چکوال، فیصل آباد، لاہور، اسلام آباد، پشاور، آزاد کشمیر، گلگت بلتستان و غیرہ میں سانحہ شکار پور کے خلاف احتجاجی مظاہرے کئے گئے۔ ملک بھر کے دیگر شہروں کی طرح دارالحکومت اسلام آباد میں بھی شیعہ علماء کونسل اسلام آباد/ راولپنڈی کی جانب سے سانحہ شکارپور لکھی در مسجد و امام بارگاہ کربلا میں نماز جمعہ کے دوران درجنوں نمازیوں کی شہادتوں کے خلاف پریس کلب اسلام آباد کے سامنے احتجاجی مظاہرہ کیا گیا، جس میں شیعہ علماء کونسل پاکستان کے مرکزی و ضلعی رہنماؤں سمیت سینکڑوں کارکنوں جن میں مرد و خواتین بچے و بوڑھے شامل تھے، نے بھرپور شرکت کی۔
احتجاجی مظاہرے کی قیادت شیعہ علماء کونسل پاکستان کے مرکزی سیکرٹری جنرل علامہ عارف حسین واحدی، مرکزی سیکرٹری مالیات علامہ سید مشتاق حسین ہمدانی، علامہ شیخ مرزا علی، علامہ فرحت عباس ہمدانی، علامہ فرحت عباس جوادی، مولانا انیس الحسنین خان، مولانا نصیر موسوی، مولانا سجاد ہمدانی، ضلعی صدر راولپنڈی مولانا غلام قاسم جعفری، ڈویژنل جنرل سیکرٹری سید محمود نقوی،مولانا سید محفوظ الحسنین کاظمی، مولانا سید ناصر عباس نقوی، سید نزاکت نقوی اور تصور عباس سمیت دیگر علماء کرام نے شرکت کی۔
اس موقع پر مرکزی سیکرٹری جنرل علامہ عارف واحدی اور شیعہ علماء کونسل کے دیگر رہنماؤں نے اپنے خطابات میں سانحہ شکار پور کی شدید مذمت کی۔ مقررین کا کہنا تھا کہ مسجد و امام بارگاہ کربلا لکھی در شکارپور میں نماز جمعہ کے دوران حالت سجدہ میں درجنوں کی تعداد میں نمازیوں کی شہادت حکومت کے ذمہ داران اور ریاستی اداروں کی ناکامی کا منہ بولتا ثبوت ہے۔ ملک میں نہ تو درس گاہیں محفوظ اور نہ ہی عبادت گاہیں۔ مظاہرین نے اس موقع پر دہشت گردوں، انکے سرپرستوں اور سہولت کاروں کے خلاف ضرب عضب آپریشن کا دائرہ وسیع کرنے اور دہشت گردوں کو تختہ دار پر لٹکانے کے عمل کو تیز کرنے کا مطالبہ کیا۔
آخر میں حکومت سے مطالبہ کیا گیا کہ واقعہ میں ملوث افراد کا سراغ لگا کر انہیں تختہ دار پر لٹکایا جائے۔ دشمن قوتیں ملک میں فرقہ وارانہ فسادات کرانی کی سازش کر رہی ہیں، ہمیں اس سازش کو مل جل کر ناکام بنانا ہوگا۔ ہماری امن پسندی کو ہماری کمزور نہ سمجھا جائے۔ ہم قائد ملت جعفریہ پاکستان علامہ سید ساجد علی نقوی کے حکم پر کسی بھی قربانی سے دریغ نہیں کریں گے۔ اس ملک میں توازن کی ظالمانہ اور غیر منصفانہ پالیسی کو دفن کرنا ہوگا اور ملک کی بنیادوں کو کمزور کرنے، افراتفری و خوف ہراس پھیلانیوالے، دہشت گردی کی سرپرستی کرنے والے اور انکے سہولت کاروں کو قانون کے شکنجے میں کسنا ہوگا اور ان فیکٹریوں کو بند کرنا ہوگا جہاں دہشتگرد جنم لے رہے ہیں۔ ریاستی اداروں کو دہشت گردی کے خاتمہ کے لئے تمام تر مفادات کو بالائے طاق رکھتے ہوئے ملک کی بقاء کے لئے ان دہشتگردوں کو منطقی انجام تک پہچانا ہوگا۔
بعدازاں ایک قرارداد میں مظاہرین نے حکومت سے مطالبہ کیا کہ سانحہ شکار پور میں ملوث افراد کا سراغ لگا کر انہیں گرفتار کرکے کیفر کردار تک پہنچایا جائے۔ ضرب عضب آپریشن کا دائرہ کار وسیع کرتے ہوئے ملک بھر میں دہشت گرد عناصر کا تعاقب کیا جائے، اور دہشت گردوں کو تختہ دار پر لٹکانے کا عمل بھی تیز کیا جائے، شہداء کے لواحقین کی دادرسی کی جائے، زخمیوں کو مناسب سہولتیں فراہم کی جائیں۔ مظاہرین نے شہداء کے خانوادوں سے تعزیت اور زخمیوں کی جلد صحت یابی کی دعا بھی کی۔