قائد ملت جعفریہ پاکستان علامہ سید ساجد علی نقوی نے گذشتہ روز فورتھ شیڈول کے معاملے کو ایس ایچ او کے سپرد کرنے کی خبر پر تبصرہ کرتے ہوئے کہا

قائد ملت جعفریہ پاکستان علامہ سید ساجد علی نقوی نے گذشتہ روز فورتھ شیڈول کے معاملے کو ایس ایچ او کے سپرد کرنے کی خبر پر تبصرہ کرتے ہوئے کہا کہ اب پُرامن شہریوں کو ایک تھانہ کے ایس ایچ او کے رحم و کرم پر چھوڑا جارہاہے کہ وہ جسے چاہے ،جب چاہے کسی بھی پُرامن شہری کیخلاف فورتھ شیڈول لسٹ میں شامل کرنے کی سفارش کرئے گا تو وہ شریف شہری دہشت گردوں کی لسٹ ( فورتھ شیڈول ) میں شامل کر دیا جائیگا جو نہ صرف شہری آزادیوں اور بنیادی انسانی حقوق کی کھلم کھلا خلاف ورزی ہوگی بلکہ اس عمل سے عوام کے ذہنوں میں ایس ایچ او ز کے بے جا اختیارات کے ناجائز استعمال کرنے کے متعلق تحفظات بڑھنے سمیت محکمہ کے خلاف نفرتیں جنم لیں گی اور ملک میں قانون کے ناجائز استعمال کے رحجان کاایک نیا سلسلہ شروع ہو جائیگا۔سیاسی و بااثر افراد جنہوں نے پہلے ہی تھانوں میں ا پنی مرضی کے ایس ایچ اوز تعینات کرائے ہوئے ہوتے ہیں مزید مضبوط ہو جائیں گے اور انہیں اپنے سیاسی مخالفین کو ہراسا ں کرنے کا مزید ایک اور موثر ہتھیار مل جائے گا اور وہ افراد جن کا دہشت گردی سے دور دور تک کوئی تعلق نہیں جو اس ملک کے وفادار اور پُرامن شہر ی ہیں ، جن کے خاندانوں نے ملکی استحکام کی خاطرقربانیاں دیں وہ اس قانون کے ناجائز استعمال کا نشانہ بنیں گے اوران عزت دار شریف لوگوں کی عزتیں بھی محفوظ نہیں رہیں گی۔ اس سے قبل بعض اداروں کے ذریعے پر امن شہریوں کے خلاف بے بنیاد اور من گھڑت رپورٹس کی بنیاد پرمختلف مقدمات میں ملوث کر کے ان کے خاندانوں کو رسوا اور ان کی زندگیوں کو تلخ کیا جارہا ہے ان کو فورتھ شیڈول لسٹ میں ڈال کر انہیں ہراساں کیا جارہا ہے۔ ہمارے مشاہدے میں ہے کہ توازن کی بے رحمانہ پالیسی کے تحت شریف ،مہذب اور قانون پسند شہریوں کی تذلیل کی جا رہی ہے جس سے ان کی زندگیاں تلخ اور خاندان شدید متاثر ہو رہے ہیں، ایس ایچ اوز کو اختیارات دینے کے بعد ان کی جانب سے بھی اختیارات کے غلط استعمال کا خدشہ بڑھ جائیگا۔ مزید برآں مشاہدے میں یہ بات سامنے آئی ہے کہ کسی بھی شخص کو من گھڑت رپورٹس تیار کرکے فورتھ شیڈول لسٹ میں ڈالنا تو بہت آسان ہے لیکن بے قصور شہریوں کا فورتھ شیڈول لسٹ سے باہرنکالنانہایت ہی مشکل اور تکلیف دہ عمل ہے جسے آسان بنانے کی ضرورت ہے ۔ علامہ ساجد نقوی نے کہا کہ ہم نے نیشنل ایکشن پلان کی حمایت کی ہے لیکن اسکی آڑ میں پنجاب بھر کے مختلف اضلاع میں شیعہ عوام کے ساتھ امتیازی سلوک دیکھنے میں آرہا ہے جو ناقابل قبول ہے ۔انہوں نے باور کرایا کہ انتظامیہ اور قانون نافذ کرنے والے ادارے اپنی کمزوریوں کو چھپانے کیلئے اس قانون کا ناجائز استعمال اور ختیارات سے تجاوز بند کریں اور انتظامیہ کی جانب سے اس اختیار و قانون کا استعمال صرف اور صرف دہشت گردوں اور ملک کا امن تباہ کرنے والوں کے خلاف ہو نا چاہیے نہ کہ پُرامن اور محب وطن شہریوں کے خلاف ۔