علامہ ساجد نقوی کی اپیل پر شیعہ علماء کونسل کا ایران پر صہیونی حملوں کیخلاف ملک گیر احتجاج
شیعہ علماء کونسل اور جے ایس اوپاکستان اور شہریوں کی جانب سے صہیونیوں کیخلاف نماز جمعہ کے بعد ملک گیر احتجاجی مظاہرے
احتجاج میں علماء کرام، شیعہ علماء کونسل اور جے ایس او کے مرکزی ، صوبائی ، ڈویژنل ، ضلعی و تحصیل کی سطح کے عہدیدارا ن شریک
راولپنڈی /اسلام آبا د 13جون 2025ء (جعفریہ پریس پاکستان )قائد ملت جعفریہ پاکستان علامہ سید ساجدعلی نقوی
کی اپیل پر شیعہ علماء کونسل پاکستان ، جعفریہ اسٹودنٹس آرگنائزیشن پاکستان سمیت دیگر مذہبی تنظیموں اور شہریوں نے چاروںصوبوں پنجاب ،سندھ ،بلوچستان ، خیبر پختونخوا ، کشمیر ،گلگت بلتستان سمیت ملک بھر کے تمام چھوٹے بڑے شہروں میں بعد از نماز جمعہ برادر ملک اسلامی جمہوری ایران پر صہیونی حملوں کیخلاف احتجاج کیاگیا۔
اس موقع پر علامہ ڈاکٹر شبیر حسن میثمی مرکزی سیکرٹری جنرل شیعہ علما کونسل پاکستان نے اسلامی جموریہ ایران پر اسرائیلی حملوں کی شدید الفاظ میں مذمت کرتے ہوئے کہاکہ اسرائیلی حملے بدترین جارحیت اور عالمی قوانین کی سنگین ترین خلاف ورزی ہے۔اعلیٰ ایرانی کمانڈرز، جوہری سائنسدانوں اور عام شہریوں کی شہادت یقینا بڑا نقصان ہے۔انہوں نے کہاکہ ایران اپنی سا لمیت و خودمختاری کے دفاع کے لیے جوابی حملے کا حق محفوظ رکھتا ہے۔
اور دنیا پر یہ بات عیاں ہے کہ اسرائیلی حملوں کو مکمل طور پر امریکی پشت پناہی حاصل ہے۔علامہ شبیر میثمی کا مزید کہناتھاکہ صہیونی حملوں نے مشرق وسطی سمیت عالمی امن کو شدید خطرات سے دوچار کر دیا ہے۔آخر میں علامہ شبیر میثمی نے صہیونی حملے میںاعلیٰ سرکاری عہدیداروں،بعض کمانڈرز اور چھ سائنسدانوں سمیت سویلین کی شہادتوں پرپاکستانی قوم و ملت کی جانب سے رہبر انقلاب اسلامی آیت ا۔۔ العظمیٰ سید علی خامنہ ای کی خدمت میں دلی ہمدردی اور گہرے دُکھ کا اظہار کیا، شہداکے درجات کی بلندی اور پسماندگان سے صبر و جمیل کی دعاکی۔