محی الدین یاسین ملیشیا کے نئے وزیراعظم بن گئے
کوالا لمپور سے موصولہ رپورٹ میں بتایا گیا ہے کہ سابق وزیر داخلہ محی الدین یاسین کو ملیشیا کے بادشاہ، سلطان عبداللہ احمد شاہ نے قومی محل میں ملک کے نئے وزیر اعظم کا حلف دلایا۔
یاد رہے کہ چورانورے سالہ مہاتیر محمد نے چوبیس فروری کو اچانک اپنے عہدے سے استعفی دے دیا تھا۔ بتایا جاتا ہے کہ مہاتیر محمد نے حکمراں اتحاد کے بعض رہنماؤں سے اختلاف کے بعد اپنے عہدے سے استعفی دیا تھا۔ مہاتیر محمد کے استعفے کے بعد محی الدین یاسین جوائنٹ ملیشین نیشنل آرگنائزیشن اور دیگر اہم اپوزیشن جماعتوں کی حمایت حاصل کرکے وزیر اعظم کے عہدے کے دعویدار بن گئے۔ جس کے بعد ملیشیا کے بادشاہ سلطان عبداللہ احمد شاہ نے سنیچر کو انہیں ملک کا نیا وزیر اعظم نامزد کردیا تھا۔ محی الدین یاسین مہاتیر محمد کی کابینہ میں وزیر داخلہ تھے۔ وہ اسی کے ساتھ سابق وزیر اعظم نجیب رزاق کی حکومت میں بھی بحیثیت نائب وزیر اعظم کام کرچکے ہیں۔