مسئلہ فلسطین حل کیلئے اقوام متحدہ جیسے ادارے بھی بے بس ہیں ، انسانیت کھڑی ہو، علامہ سید ساجد علی نقوی
پلاننگ کے تحت فلسطینیوں کو اپنی سرزمین سے بے دخل کرکے غاصب ریاست کومضبوط کیا گیا ، قائد ملت جعفریہ
فلسطینی مقاومت ، استقامت، صبر و حوصلے نے صہیونیت اور اسکے غرو ر کو خاک میں ملادیا، عالمی دن پر پیغام
راولپنڈی /اسلام آباد29 نومبر2024ء ( جعفریہ پریس پاکستان ) قائد ملت جعفریہ پاکستان علامہ سید ساجد علی نقوی کہتے ہیں مسئلہ فلسطین کے حل کیلئے عالمی سامراج کے سامنے سبھی بے بس ہوچکے،غزہ سمیت مشرق وسطیٰ میں انسانیت سسک رہی ہے لہٰذا اب انسانیت کو کھڑا ہونا ہوگا،
پلاننگ کے تحت فلسطینیوں کو اپنی سرزمین سے بے دخل کرکے غاصب ریاست کو توسیع دینے کی سازشوں کو مظبوط بنایاگیا ،مذمتی قراردادیں وبیانات اور مظلوم عوام سے اظہار یکجہتی کا دن منانا بھی خوش آئند البتہ عملی اقدامات کے بغیر مظلوموں کو حق ملنا ممکن نہیں ، اسرائیل فلسطین میں ظلم کی تمام حدیں پار کرچکاہے ۔ ان خیالات کا اظہار انہوںنے فلسطینی عوام سے اظہار یکجہتی کے عالمی دن پر اپنے پیغام میں کیا۔
قائد ملت جعفریہ علامہ سید ساجد علی نقوی نے کہاکہ23 مارچ 1940ء کو قرارداد پاکستان کے ساتھ قرارداد فلسطین کی منظوری اور اس کے علاوہ بانی پاکستان کے 27اگست 1948ء کے بیان ”ہم یکساں طورپر خطرناک اور کٹھن دور سے گز رہے ہیں ہم اپنے اسلامی اتحاد کے ذریعے دنیا کے مشورہ خانوں میں اپنی آواز کی قوت محسوس کر اسکتے ہیں ”کاحوالہ دیتے ہوئے کہاکہ پاکستان کوعملی میدان میں مسئلہ فلسطین کیلئے اقدامات کو مزید تیز کرنا ہوگا ۔انہوں نے مزید کہاکہ سات دہائیوں سے زائد عرصہ گزر گیا ، سب کچھ بدل گیا، مگر آج بھی فلسطینی ہر قسم کے ظلم وستم کی چکی میں پس رہے ہیں ۔فلسطینیوں نے جس طرح مقاومت، استقامت، صبر و حوصلے کے ساتھ صیہونیت اور اس کے غرو ر کو خاک میں ملایا وہ اپنی مثال آپ ہے
انہوں نے مظالم و سفاکوں کا اصل چہرہ دنیا کو دکھادیا۔ ہم روز اول کی طرح آج بھی فلسطینی عوام کے عالمی، آئینی، بنیادی اور انسانی حقوق کیلئے ان کے ساتھ کھڑے ہیں اور سامراجی، صہیونی قبضے اور بہمیت کی شدید الفاظ میں مذمت کیساتھ واضح کرتے ہیں کہ جب تک مسئلہ فلسطین فلسطینیوں کی اُمنگوں کے مطابق حل نہیں کیا جائیگا مشرق وسطیٰ اور اقوام عالم میں پائیدار امن کا قیام ممکن نہیں ہوگا۔