وزیر اعلیٰ گلگت بلتستان سید مہدی شاہ کی قائد ملت جعفریہ پاکستان حضرت آیت اللہ علامہ سید ساجد علی نقوی سے خصوصی ملاقات

اسلام آباد جعفریہ پریس- وزیر اعلیٰ گلگت بلتستان سید مہدی شاہ نے نمائندہ ولی فقیہ وقائد ملت جعفریہ پاکستان حضرت آیت اللہ علامہ سید ساجد علی نقوی سے خصوصی ملاقات کی۔ ملاقات میں وزیر اعلیٰ گلگت بلتستان سید مہدی شاہ نے قائد ملت جعفریہ پاکستان کو جی بی کی تازه ترین سیاسی صورتحال ، امن و امان اور دیگر امور پرتفصیلی بریفنگ دی ۔ اس موقع پرقائد ملت جعفریہ پاکستان نے قانون کے نفاذ پر تاکید کرتے ہوئے کہا کہ ہم نے ہمیشہ ملکی سلامتی اور استحکام میں تعاون کیا ہے-انہوں نے مزید کہا کہ قومی سلامتی اور ملک کا استحکام عدل و انصاف کی فراہمی سے ممکن ہے قانون کی حکمرانی کو یقینی بنانے سے ہی بدامنی اور دہشت گردی کا خاتمہ کیا جا سکتا ہے-
قائد ملت جعفریہ پاکستان نے کہا کہ ملک اس وقت سنگین مسائل سے دوچار ہے اور بعض قوتیں اپنی منفی سوچ اور تخریبی کردار کے ذریعہ جلتی پر تیل ڈالنے کا کردار ادا کررہی ہیں ، پوری قوم کو یکجا ہوکر ایسی ملک دشمن قوتوں کا مقابلہ کرنا ہوگا، ملک میں شیعہ سنی کا کوئی مسئلہ نہیں ہے چند سازشی عناصر فرقہ واریت کی آڑ میں مذموم مقاصد حاصل کرنا چاہتے ہیں، باہمی رواداری اور اتحاد ویکجہتی کو مضبوط بنا کر ان سازشوں کو ناکام بنانا ہوگا اورگلگت بلتستان کی فضاء کو بھی اتحاد و وحدت کے ذریعے بہتر بنایا جاسکتا ہے جس میں مقامی علماء کرام بہترین کردار ادا کر رہے ہیں-