پاراچنار، راستوں کی بندش ، شیعہ علماء کونسل پاکستان کا جمعہ کے روز ملک گیر احتجاج کا اعلان
شیعہ علماء کونسل پاکستان پہلے مرحلے پر جمعہ 27 دسمبر 2024 کو ملک گیر بھرپور یوم احتجاج منائے گی، مرکزی سیکرٹری جنرل شیعہ علماء کونسل پاکستان
علامہ شبیر میثمی نے اس امر کا اعلان قائد ملت جعفریہ سے پارا چنار مرکز، انجمن حسینیہ، عوامی نمائندے اور پارا چنار کے جرگہ عمائدین پر مشتمل مشترکہ وفد کی ملاقات کے بعد کیا
روالپنڈی/اسلام آباد 26 دسمبر 2024ء (جعفریہ پریس پاکستان )شیعہ علماء کونسل پاکستان نے ضلع کرم کی مظلوم عوام پر راستوں کی بندش کے نتیجے میں ادویات اور دیگر ضروریات زندگی کی رسد بند کرنے کے خلاف پہلے مرحلے میں 27 دسمبر 2024 کو بعد از نماز جمعہ ملک گیر بھرپور احتجاج کی کال دی ہے اورپیغام دیا ہے کہ اگر فوری طور پر ضلع کرم کے ملک کے دیگر حصوں سے منقطع راستے نہ کھولے گئے اور راہداری پر عوام کے تحفظ کو یقینی نہ بنایا گیا تو آئندہ مراحل میں ملک بھر میں احتجاج کو مستقل کیا جا سکتا ہے۔
شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی نے اس امر کا اعلان قائد ملت جعفریہ پاکستان حضرت علامہ سید ساجد علی نقوی سے پارا چنار مرکز، انجمن حسینیہ، عوامی نمائندے اور پارا چنار کے جرگہ عمائدین پر مشتمل مشترکہ وفد کی ملاقات کے بعد کیا۔ انہوں نے بتایا کہ عمائدین پارا چنار کے نمائندہ وفد نے خطیب امام جمعہ مرکز پارا چنار علامہ شیخ فدا حسین مظاہری کی سربراہی میں قائد ملت جعفریہ علامہ سید ساجد علی نقوی سے ملاقات کی جس میں ایم پی اے کے پی کے علی ہادی عرفانی، جرگہ ممبران آغا سید تجمل حسین الحسینی، آغا اخلاق حسین شریفی، حاجی رؤف حسین، مجاہد حسین ہادی، حاجی ملک سردار حسین اور ڈاکٹر حسن سمیت دیگر شامل تھے۔
وفد نے قائد ملت جعفریہ کو پارا چنار کے راستوں کی بندش سے ادویات اور دیگر بنیادی ضروریات زندگی کے ناپید ہونے کے باعث مسلسل معصوم بچوں اور بزرگوں کے جانی ضیاع کے بھی متعلق مکمل بریفنگ دی ۔قائد محترم نے شیعہ علماء کونسل پاکستان کو اہل کرم کی مظلوم عوام کے بنیادی حقوق کی ان خلاف ورزیوں پر ملک گیر احتجاج کی کال دینے کی ہدایت کی جس پر شیعہ علماء کونسل پاکستان پہلے مرحلے پر جمعہ 27 دسمبر 2024 کو ملک گیر بھرپور یوم احتجاج منائے گی۔ علامہ ڈاکٹر شبیر حسن میثمی نے ضلع کرم کے شہداء کے خانوادوں سے اظہار تعزیت کی اور مظلوم عوام کے ساتھ اظہار یکجہتی کرتے ہوئے ملّی پلیٹ فارم شیعہ علماء کونسل پاکستان کے ہر سطح پر صدائے احتجاج بلند کرنے کا بھی یقین دلایا۔