چھ جولائی: عادلانہ نظام کے قیام اور عوامی و بنیادی حقوق کی پاسداری کا یوم ہے، قائد ملت جعفریہ

چھ جولائی: عادلانہ نظام کے قیام اور عوامی و بنیادی حقو ق کی پاسداری کا یوم ہے، قائد ملت جعفریہ علامہ ساجد نقوی
 5 جولائی وہ دن جب حسب روایت پاکستان مارشل لاءکی لپیٹ میں آیا جسکی تباہ کاریاں آج تک ملک بھگت رہا ، قائد ملت جعفریہ پاکستان
 نئے حوصلہ و جذبے کیساتھ بنیادی حقوق کی جدوجہد تیز کرنا ہوگا تاکہ ملک صحیح معنوں میں اسلامی، فلاحی ،جمہوری ریاست بن سکے، بیان
راولپنڈی / اسلام آباد 5 جولائی2023 ء(  جعفریہ پریس پاکستان  ) قائد ملت جعفریہ پاکستان علامہ سید ساجد علی نقوی نے 5 جولائی 1977 ءکے مارشل لاءکا تذکرہ کرتے ہوئے کہاکہ ایک مرتبہ پھر حسب روایت اس روزپاکستان مارشل لاءکی لپیٹ میں آیا جس کی تباہ کاریاں آج تک ملک بھگت رہا ہے ۔
قائد ملت جعفریہ پاکستان علامہ سید ساجد علی نقوی نے 6 جولائی “یوم فقہ جعفریہ “کے موقع پر اپنے پیغام میں کہا کہ مشہور مقولہ ہے ”ہرکہ آمد عمارت نوساخت “ جو بھی آیا اُس نے نئی عمارت تعمیر کی ۔ ملک میں جب اسلامائزیشن کانعرہ لگاتوتاریخ کے تلخ تجربات کے تحت ہرطبقہ فکرمیں یہ تشویش پیدا ہوئی کہ کسی خاص برانڈ کا اسلام نافذ نہ ہو جائے، اسی تشویش کو چھ جولائی 1980ءکے پروقار، مہذب و قانونی احتجاج نے جہت اور راستہ دیا ۔یہ احتجاج عوام کی اس تشویش کو راستہ دینے کی کوشش تھی اور عوام میں شعور اجاگر کرنے کے ساتھ حکمرانوں کو بھی باور کرانا تھا کہ مسلم سکالرز، محققین، مجتہدین اورفقہاکی علمی و تحقیقی کاوشوں سے استفادہ کرکے اور جدید دور کے تقاضوں پر تطبیق کرکے ایسا عادلانہ نظام نافذ کیا جائے جو دنیا کےلئے ایک نمونہ قرار پائے اور جو انتہا پسندی، فرقہ واریت، تعصب اورمسلکیت سے بالاترہو۔ انہو ں نے کہا کہ 6 جولائی کادن عادلانہ نظام کے قیام اور عوام کے اُن جائز حقوق کے حصول کا دن ہے جو آئین نے تمام مکاتب فکر کو دئیے ہیں۔ یہ دن وحدت امّہ کے لیے سنگ میل ہے اور اس دن تمام مسالک اور مکاتب کے درمیان ایک دوسرے کے عقائد ونظریات اور رسوم و عبادات کے احترام کا دائرہ کار واضح اور مشخص کیا گیا ۔ قائد ملت جعفریہ پاکستان نے مزید کہاکہ افسوس آج تک ملک کے تمام مکاتب فکر و مختلف نکتہ نظر رکھنے والوں کے حقوق کا خیال نہیں رکھا جارہا اور پرامن صدائے احتجاج کو بھی روکنے کےلئے ظالمانہ انداز اختیار کئے جاتے ہیں۔ آج کا دن یوم تجدید ِعہد ہے کہ عوا م کے ساتھ معاشرے کے سنجیدہ طبقات ایک بار پھر نئے حوصلے اور نئے جذبے کے ساتھ اپنے حقوق کی جد وجہدتیز کریں اور پاکستان کو صحیح معنوں میں اسلامی ، فلاحی ، جمہوری ریاست بنانے کےلئے اپنا کردار ادا کریں۔