یوم ولادت امام علی نقی الہادی ؑ پر قائد ملت جعفریہ پاکستان کا پیغام

راولپنڈی/ اسلا م آباد۔21 جون 2024 ء (جعفریہ پریس پاکستان)قائد ملت جعفریہ پاکستان علامہ سید ساجد علی نقوی نے امام دہم امام علی نقی ؑ کے یوم ولادت(15 ذی الحجہ) پر کہاہے کہ امام علی نقی الہادی ؑ نے اپنی روحانیت اور امامت کے ذریعے انفرادی اور ذاتی زندگی میں انسانوں کی رہنمائی فرمائی وہاں اجتماعی طرز زندگی اور حکمرانی جیسے معاملات میں بھی لوگوں کو ان کی ذمہ داریوں سے آگاہ کیا اسی لئے آپ کی سیرت آج بھی دنیا کے ہر انسان اور ہر معاشرے کے لئے مشعل راہ ہے اور نمونہ عمل ہے۔
علامہ ساجد نقوی کامزید کہنا ہے کہ امام ہادی‘ نجیب‘ مرتضی ‘ نقی‘ عالم‘ فقیہ‘ امین اور طیب جیسے مشہور القابات کے حامل کی کنیت ابو الحسن ثالث معروف ہے۔ آپ کے اقوال کا زیادہ حصہ اہم موضوعات پر مشتمل ہے جن میں تشبیہ و تنبیہ اور جبر و اختیار وغیرہ شامل ہیں۔ زیارت جامعہ کبیرہ جو حقیقت میں امامت سے متعلق عمدہ مسائل اور امام شناسی کا ایک مکمل دورہ ہے آپ ہی کی یادگار ہے۔امامت کے دوران مختلف علاقوں میں نمائندگان کا تعین کر کے پیروکاوں سے رابطے میں رہے اور انہی وکلاءکے ذریعے مسائل کو بھی حل و فصل کیا کرتے تھے۔
علامہ ساجد نقوی کے مطابق متوکل کے بر سر اقتدار آنے سے پہلے والے خلفاءکی روش ماضی کے خلفا ہی کی روش تھی۔اس روش نے ایک حد تک علویوں کے لئے مساعد و مناسب سیاسی ماحول پیدا کردیا تھا۔ برسر اقتدار حکمران کے آتے ہی تنگ نظریوں کا آغاز ہوا اور اکسا ہٹ اور سرکوبی شروع کردی اور یہ سلسلہ شدت کے ساتھ جاری رہا۔ یہ وہ زمانہ تھا جب رسول اللہ کی بعثت کے اہداف و مقاصد اور امامؑ کا ہم عصر معاشرے اور حکمرانوں کے درمیان بڑا فاصلہ حائل ہوچکا تھا اور آپ ؑ گھٹن کے اس دور میں رسول اللہ کے اہداف کے لئے کوشش کر رہے تھے اور اللہ کی عنایت خاصہ سے اس عجیب طوفان اور مبہم صورت حال میں کشتی ہدایت کو ساحل تک پہنچانے میں کامیاب ہوئے اور آپ نے ہدایت و ارشادو ابلاغ کے عصری تقاضوں کو سامنے رکھ کر اسلامی معارف و تعلیمات کی نشر و اشاعت میں فیصلہ کن کردار ادا کیا۔ یہ وہ زمانہ تھا کہ مختلف روشویں اور مختلف گروہ اسلامی معاشرے کو گمراہ کرنے میں مصروف تھے حقیقت یہ ہے کہ آج امام ہادیؑ کے گرانقدر آثار ہمارے درمیان موجود ہیں۔ جو روشیں امامؑ اس دور میں اسلام کی راہ میں بروئے کار لارہے تھے وہ بالکل منفرد اور اپنی مثال آپ تھیں۔ غ±لات کی سرگرمیوں کی وجہ سے انحرافات نے اپنی یلغار کا نشانہ بنانا شروع کیا تو امام نے تمام انحرافات کا ڈٹ کر مقابلہ کیا ۔