جعفریہ پریس – شیعہ علماء کونسل کے مرکزی سیکرٹری جنرل علامہ عارف حسین واحدی نے شیعہ علماء کونسل گلگت بلتستان کے زیر اہتمام ورکرز کنونشن سے ٹیلی فونک خطاب میں قوم کو 23 مارچ کی مبارکباد دیتے ہوئے کہا کہ 23 مارچ کا دن اتحاد امت اور تجدید عہد کا دن ہے۔ قائد اعظم محمد علی جناح اور ان کی ٹیم کو خراج تحسین پیش کرتے ہیں ۔ ہم ملکر اُن کی جدوجہد کو آگے بڑھانے کیلئے انفرادی اور اجتماعی طور پراپنا اپنا کردار ادا کر رہے ہیں۔ شہید آغا ضیا الدین رضوی جو قائد ملت جعفریہ پاکستان کے وفا دار ساتھی تھے ان کے نام پر منعقدہ ورکرز کنونشن نے جوانوں میں ایک نئی بیداری پیدا کی ۔ ان کی زحما ت اور خدمات لائق تحسین ہیں۔ اسی مشن کو لیکر آگے بڑھ رہے ہیں ۔ گلگت بلتستان کے انتخابات میں شہید ضیاء الدین رضوی کی فکر کو لیکر بھرپور قوت کیساتھ انتخابات میں آرہے ہیں۔ اور اس کا مقصد ایک بہت بڑی کامیابی حاصل کرنا ہے۔ اس خطے کو آئینی حقوق دلوانے میں اپنا کردار ادا کریں گے۔ تمام طبقات اور مکاتب فکر کو ساتھ لیکر اتحاد و وحدت کی فضا قائم کرینگے۔ اس خطے میں امن و امان ، استحکام ،خوشحالی کیلئے اپنی جدوجہد جاری رکھیں گے۔ جس جذبے کیساتھ تمام ورکرز گلگت سے تشریف لائے اور اتنا بڑا اجتماع موجود ہے۔ سب کا شکریہ ادا کرتا ہوں۔ آپ خوش نصیب ہیں کہ اللہ تعالیٰ کی ذات نے آپ کو قائد بزرگوار علامہ سید ساجدعلی نقوی جیسی حکیمانہ ، دانشمندانہ اور دلیرانہ قیادت عطا فرمائی۔ جنہوں نے ہر دور میں اس ملک میں اور دنیا پر ثابت کیا کہ ہم اس ملک کی مثبت قوت ہیں۔ قربانیاں تودے سکتے ہیں لیکن ملک کے امن کو تہہ و بالا نہیں ہونے دینگے۔ اس سے قبل علامہ مفتی جعفراور علامہ شہید عار ف الحسینی کا کردار بھی لازوال ہے۔ آخر میں تمام جوانوں ، عمائدین اور علماء کرام کو گذارش کرتا ہوں کہ مذہبی حلقوں کے اندر اتحاد واتفاق ،اخوت و محبت پیدا کرکے اس جذبے کے ساتھ آگے بڑھیں جو 23 مارچ کو لیا ہے۔ اسلاف کا جذبہ ہے تو انشاء اللہ یہ ملک بھی خوشحال ہوگا اور ہم سربلند ہونگے۔ ورکرز کنونشن کے اس پروگرام کے شاندار کامیابی کے انعقاد پر تمام انتظامیہ وعہدیداران شیعہ علماء کونسل گلگت بلتستان کو مبارکباد دیتا ہوں۔