شہید علامہ سید ضیاء الدین رضوی اس خطے میں تمام مکاتب فکر کے عوام کے حقوق کی بات کرتے تھے , سازش کے تحت قتل کرکے ہمیں تقسیم کیا گیا، شیخ گلاب شاکری

جعفریہ پریس – عوامی ایکشن کمیٹی کے زیر اہتمام گلگت بلتستان کے دارلخلافہ اور مرکزی شہر گلگت میں گھڑی باغ میں جاری مرکزی دھرنے سے خطاب کرتے ہوئے شیعہ علماء کونسل ضلع ہنزہ نگر کے راہنما مولانا شیخ گلاب حسین شاکری نے کہا کہ شہید علامہ سید ضیاء الدین رضوی اس خطے میں تمام مکاتب فکر کے عوام کے حقوق کی بات کرتے تھے اور انہوں نے اپنی پوری زندگی گلگت بلتستان کے محروم و محکوم عوام کے حقوق کیلئے جدوجہد میں صرف کی مگر نا عاقبت اندیش حکمرانوں نے ہمارے عوام کو فرقہ وارانہ بنیادوں پر تقسیم کرکے ایک سوچی سمجھی سازش کے تحت شہید علامہ سید ضیاء الدین رضوی جیسی پر امن اور دور اندیش شخصیت کو شہید کروا کر ہمیں باہم دست و گریباں کرایا گیا۔ مگر الحمد اللہ آج عوامی ایکشن کمیٹی کے اس مشترکہ و نمائندہ پلیٹ فارم پر اپنے حقوق کیلئے تمام تر لسانی، فرقہ وارانہ اور علاقائی تعصبات سے بالاتر ہو کر عوام نے اپنے حقوق کیلئے متحد ہو کر حکمرانوں کو یہ پیغام دیدیا ہے کہ اب مزید یہ کھیل زیادہ دیر تک نہیں چل سکے گا۔ انکا مزید کہنا تھا کہ عوامی ایکشن کمیٹی کے تمام مطالبات پر عمل درآمد تک ہم عوامی ایکشن کمیٹی کا بھر پور ساتھ دینگے۔