شیعہ علماء کونسل آزاد کشمیرکی علاقائی کونسل کا ایک اہم اجلاس ،علامہ سید صادق حسین نقوی بلا مقابلہ صدرمنتخب

جعفریہ پریس- شیعہ علماء کونسل آزاد کشمیرکی علاقائی کونسل کا ایک اہم اجلاس مدرسہ زینبیہ راولپنڈی میں علاقائی آرگنائزر سید ذوالفقار حسین بخاری کی صدارت میں منعقد ہوا جس میں شیعہ علماء کونسل پاکستان کے مرکزی سیکریٹری مالیات علامہ سید مشتاق حسین ہمدانی اور جعفریہ یوتھ کے مرکزی ناظم اعلی سید اظہار بخاری مہمانان خصوصی تھے۔ اجلاس میں آزادکشمیر کے مختلف اضلاع سے ضلعی صدور و جنرل سیکریٹریز اور دیگر تنظیمی عہدیداران اور علماء کرام نے شرکت کی۔ جس میں حالیہ ملکی سیاسی صورت حال ‘ پاکستان میں امن و امان کے حوالے سے ابتری‘ خطہ کشمیر میں ہونے والی سیاسی تبدیلیاں‘ حالیہ دنوں میں آنے والے سیلاب کی تباہ کاریوں اور آزادکشمیر میں تنظیمی پیش رفت کے حوالے سے تفصیلی گفتگو ہوئی جس کے بعد نئے علاقائی صدر کے انتخاب کا مرحلہ طے کیا گیا- جعفریہ پریس کی رپورٹ کے مطابق اجلاس میں مدرسہ شہید حسینی کوٹلی کے پرنسپل اور معروف دینی شخصیت علامہ سید صادق حسین نقوی کو بلا مقابلہ صدر منتخب کیا گیا ۔ علامہ سید مشتاق حسین ہمدانی نے نومنتخب صدر سے حلف لیا جس کے بعد مہمانان خصوصی اور نومنتخب صدر نے تنظیمی ارتقاء اور موجودہ حالات میں شیعہ علماء کونسل کی فعالیت میں اضافے کے حوالے سے پر مغز گفتگو کی۔ نو منتخب صدر نے اعلان کیا کہ بہت قلیل عرصے میں علاقائی کابینہ تشکیل دے دی جائے گی جبکہ جعفریہ یوتھ کے علاقائی سیٹ اپ کے قیام کے لیے بھی ساتھ ساتھ تعاون کیا جائے گا اور اس کے بعد اضلاع کے دورہ جات کئے جائیں گے۔