اب میدانوں کی باری ہے خود کو آمادہ وتیار رکھو اب اگرکوئی بھی سازش ہوئی تو فوری رد عمل ہوگا، قائد ملت جعفریہ پاکستان

جعفریہ پریس – نمائندہ ولی فقیہ و قائد ملت جعفریہ پاکستان حضرت آیت اللہ علامہ سید ساجد علی نقوی نے ٹنڈو آدم میں شیعہ علماء کونسل سندھ کے رہنما شہید قیصر حسین چغتائی کی پہلی برسی میں خطاب کے دوران شہید کی سماجی، مذہبی اور تنظیمی خدمات کا تذکرہ کرتے  ہوئے کہا کہ شہید کی عظیم خدمات ہیں جنہیں یاد رکھا جائے گا – قائد ملت جعفریہ پاکستان نے مزید کہا کہ پاکستان کے حالات پر ہماری گہری نظر ہے مت گھبراؤ ، مت پریشان اور مت مایوس ہو، ہم نے ایوانوں میں شیعیت کا تحفظ کیا ہے اور تمام سازشوں کو روند ڈالا ہے اب ایوانوں میں کوئی سازش نہیں ہوسکتی – جعفریہ پریس کی رپورٹ کے مطابق اس وقت عوام کا جوش وخروش دیدنی تھا اور پورا پنڈال لبیک یا حسین لبیک یا قائد کے نعرؤں سے گونج اٹھا جب قائد ملت جعفریہ نے کہا کہ اب میدانوں کی باری ہے خود کو آمادہ وتیار رکھواب اگرکوئی بھی سازش ہوئی تو فوری رد عمل ہوگا- حضرت آیت اللہ علامہ سید ساجد علی نقوی نے کہا کہ لوگ شریعت کی باتوں سے گھبرا رہے ہیں میں کہتا ہوں مت گھبراؤ- انہوں نے کہا کہ اپنے لوگوں میں بیٹھ کر نعرے لگوانا آسان ہے لیکن میں نے شریعت کی باتیں کرنے والوں کے بیچ میں تقریر کر کے بولا تھا اور میں نے بتادیا تھا مذہبی جماتوں کے جلسوں میں تقریر کر کے کہ شریعت کے سب سے بڑے حامی ہم ہیں مگر اس شریعت کے جس کی حمایت اہلبیت کرتے ہیں وہ شریعت جس کے لیے حسین ابن علی ع نے اپنی جان کی قربانی دی-اس موقع پر مقامی علماء کرام وشیعہ علماء کونسل سندھ کے دیگر رہنماؤں سمیت علامہ سید ناظر عباس تقوی نے بھی خطاب کیا-