علامہ حسن ترابی  پاکیزہ اہداف کے حصول کی راہ میں شہید ہوئے، قائد ملت جعفریہ علامہ ساجد نقوی

علامہ حسن ترابی  پاکیزہ اہداف کے حصول کی راہ میں شہید ہوئے، قائد ملت جعفریہ علامہ ساجد نقوی
شہید علامہ حسن ترابی نے صوبہ سندھ میں بے پناہ خدمات کے ساتھ وحدت و اخوت کے پیغام کو پھیلانے میں شب و روز جدوجہد کی
 شہید کی ملی خدمات، ان کے مشن ،ہدف اور مقصد کو آگے بڑھانے اور حقیقی معنوں میں خراج عقیدت پیش کرنے کیلئے لازم و ناگزیر ہے
راولپنڈی /اسلام آباد14جولائی 2023ء ( جعفریہ پریس پاکستان  )قائد ملت جعفریہ پاکستان علامہ سید ساجد علی نقوی نے کہا ہے کہ علامہ حسن ترابی نے متواتر اور مسلسل جدوجہد جاری رکھی اور ا اہداف کے حصول اور مشن کی تکمیل کی خاطر اس راہ میں درجہ شہادت پر فائز ہوگئے۔ شہید علامہ حسن ترابی کی 17ویں برسی کی مناسبت سے اپنے پیغام میں علامہ ساجد نقوی نے کہا کہ قرآنی و نبوی ۖتصور کے مطابق امت مسلمہ در حقیقت امت واحدہ ہے۔ اس تصور کو اجاگر کرتے ہوئے ہم نے امت مسلمہ کی وحدت کو ایک تنظیم اور نظم کی صورت دے کر اس ملک میں بلکہ برصغیر کی تاریخ میں منفرد اور معتبر فورمز کی تاسیس میں بنیادی کردار ادا کیا۔ جس کے اثرات ملک کے گلی کوچوں تک پہنچے جس کے نتیجے میں نہ صرف اسلامیان پاکستان بلکہ عالم اسلام کسی نہ کسی حوالے سے استفادہ کررہا ہے۔ ان فورمزکے ذریعہ خاص طور پر صوبہ سندھ میں شہید علامہ حسن ترابی نے بے پناہ خدمات سرانجام دیں اور وحدت و اخوت کے پیغام کو پھیلانے میں شب و روز جدوجہد کی ۔انہوں نے مزید کہا کہ شہید کی ملی خدمات، ان کے مشن ،ہدف اور مقصد کو آگے بڑھانے ،ان کی یاد منانے اور حقیقی معنوں میں خراج عقیدت پیش کرنے کیلئے لازم و ناگزیر ہے ان کے مثبت کردار کو مشعل راہ بنایا جائے ۔ برسی کے اس موقع پر قائد ملت جعفریہ پاکستان نے شہید علامہ حسن ترابی کے خانوادے کی دلجوئی کرتے ہوئے شہید حسن ترابی اور شہدائے ملت کے درجات کی بلندی اور وطن عزیز کے استحکام و سلامتی کی خصوصی دعا کی۔