قائد ملت جعفریہ سمیت شیعہ علماء کونسل کی سراج الحق کو مبارکباد، امید ہے نومنتخب امیر جماعت اتحاد امت کیلئے کوشاں رہیں

جعفریہ پریس – قائد ملت جعفریہ پاکستان حضرت آیت اللہ علامہ سید ساجد علی نقوی کا سراج الحق کو امیر جماعت اسلامی منتخب ہونے پر مبارکباد دی اور فرمایا کہ امید ہے نومنتخب امیر جماعت اسلامی اتحاد امت کیلئے اپنی کاوشیں بروئے کار لائینگے۔ شیعہ علماء کونسل پاکستان نے بھی امیر جماعت اسلامی منتخب ہونے پر سراج الحق کو مبارک باد دی اور سیکرٹری جنرل علامہ عارف حسین واحدی نے کہا کہ جماعت اسلامی میں مثبت تبدیلی خوش آئند ہے اورامید ظاہر کی کہ قاضی حسین احمد کے مشن کو سراج الحق آگے بڑھائیں گے۔
اپنے تہنیتی پیغام میں قائد ملت جعفریہ پاکستان حضرت آیت اللہ علامہ سید ساجد علی نقوی نے جماعت اسلامی کے مرکزی رہنما اور صوبہ خیبرپختونخواہ کے سینئر وزیر سراج الحق کو امیر جماعت اسلامی منتخب ہونے پر مبارک باد پیش کرتے ہوئے امید کا اظہار کیاہے کہ سراج الحق اتحاد امت کیلئے اپنی کاوشیں بروئے کار لائیں گے اور جماعت اسلامی کو اسی ٹریک پر لے کر چلیں گے جس طرح مرحوم قاضی حسین احمد لے کر جارہے تھے ۔
شیعہ علماء کونسل کے مرکزی سیکرٹری جنرل علامہ عارف حسین واحدی نے اپنے تہنیتی پیغام میں کہاکہ جماعت اسلامی میں مثبت تبدیلی خوش آئند ہے اور سراج الحق جیسی بردبار شخصیت کو منتخب کرنے پر نومنتخب امیر سمیت جماعت اسلامی کے کارکنان بھی مبارک باد کے مستحق ہیں ۔ انہوں نے کہاکہ جماعت اسلامی کے ساتھ ہمیشہ اچھی ورکنگ ریلیشن شپ رہی ہے اور امید ہے سراج الحق کے صدر منتخب ہونے کے بعد اس میں مزید بہتری آئیگی۔