محرم الحرام کے دوران حساس علاقوں کے امام بارگاہوں میں واک تھروگیٹ لگائے جائیں،علامہ شیخ مرزا علی

جعفریہ پریس- شیعہ علما ء کونسل گلگت کا محرم اؒ لحرام کے حوالے سے ایک اہم جلاس صوبائی سینئر نائب صدر علامہ شیخ مرزا علی کے زیر صدارت صوبائی آفس میں منعقد ہوا جسمیں علما ء کرام ، ذیلی انجمنوں کے صدور ، یونٹس صدور ، جے ۔ایس ۔او ، جعفریہ یوتھ اور معززیں علاقہ کی کثیر تعداد نے شرکت کی ۔ اجلاس سے خطاب کرتے ہوئے علامہ شیخ مرزا علی نے کہا کہ محرم الحرام کی آمد ہے او ر دہشت گرد وں کی نظریں اس حساس علاقے پر لگی ہوئی ہیں ان حالات کے پیش نظر انتظامیہ کو چاہئے کہ دہشت گردوں پر کڑی نظر رکھیں اور عزاداروں کا تحفظ یقینی بنائیں۔ آئین پاکستان کی رو سے عزاداری ہمارا حق ہے جبکہ ہمیں محدود کرنے کی کوشش کی جارہی ہے عزادروں کو تحفظ دینا انتظامیہ کی ذمہ داری ہے ۔ انہوں نے کہا کہ محرم الحرام کے دوران حساس علاقوں کے امام بارگاہوں میں واک تھر وگیٹ لگائے جائیں اور سیکورٹی کے فول پروف انتظامات کئے جائیں ۔ انہوں نے گلگت انتظامیہ کی غیر ذمہ داری کا تذکرہ کرتے ہوئے کہا کہ سکردوکے ڈپٹی کمشنر وہاں کے ذمہ داروں کو بلا کر میٹنگ کرتے ہیں جبکہ یہاں کی انتظامیہ غیر ذمہ داروں کو بلا کرمیٹنگ کرتی ہے جو کہ قابل آفسوس ہے ۔ انہوں نے مزید کہا کہ محرم الحرام سے قبل جٹیال علی مسجدمیں بم رکھنا اور سانحہ حراموش کا واقعہ رونما ہونا لمحہ فکریہ ہے مگر دوسری جانب انتظامیہ نے دونوں واقعات کو کوئی خاص توجہ نہیں دی اور اب اطلاعات ہیں کہ دہشت گرد تنظیم داعش کا اثر ورسوخ گلگت کی طرف بڑھ رہا ہے لہذا حکومت قبل از وقت حکمت عملی ترتیب دے اور دہشت گردوں کے نیٹ ورک کا قلع قمع کیا جائے۔ انہوں نے کہا کہ ہم سب کی ذمہ داری بنتی ہے کہ حالات پر گہری نظر رکھیں تاکہ محرم الحرام کے مقدس مہینے میں کوئی ناخوشگوارواقعہ رونما نہ ہو سکے ۔ اجلاس میں محرم الحرام کیلئے شیعہ علما ء کونسل کا ’’ جعفریہ عزاداری رابط کونسل ‘‘ کا قیام عمل میں لایا گیا جو محرم الحرام میں انتظامات ، عزاداروں کے تحفظ کیلئے اقدامات اور انتظامیہ سے رابط کرئے گی ۔