اسلام آباد جعفریہ پریس پاکستان
پاکستان بھر میں اربعین حسینیؑ 2026 کی مناسبت سے عوامی جوش و عقیدت اپنے عروج پر پہنچ چکی ہے۔ ملک کے بڑے اور چھوٹے شہروں میں عاشقانِ اہل بیتؑ اربعین کی یاد منانے کے لیے بھرپور تیاریوں میں مصروف ہیں، جبکہ مجالسِ عزا، جلوسِ اربعین، سبیلوں، نیاز اور خدمتِ زائرین کے انتظامات کو آخری مراحل میں پہنچا دیا گیا ہے۔
کراچی، لاہور، راولپنڈی، اسلام آباد، پشاور، کوئٹہ، ملتان، فیصل آباد، حیدرآباد، سکھر، بہاولپور، سرگودھا، گوجرانوالہ، سیالکوٹ، ڈیرہ اسماعیل خان، گلگت، اسکردو، مظفرآباد اور ملک کے دیگر شہروں میں لاکھوں عزادار اربعین حسینیؑ کے اجتماعات اور جلوسوں میں شرکت کریں گے۔ مختلف مذہبی، سماجی اور فلاحی تنظیموں کے رضاکار عزاداروں کی خدمت کے لیے سبیلوں، لنگر، طبی امداد اور دیگر سہولیات کی تیاریوں میں مصروف ہیں۔
اربعین حسینیؑ کے موقع پر ملک بھر میں محبتِ اہل بیتؑ، اخوت، بھائی چارے، اتحادِ بین المسلمین اور قومی یکجہتی کی ایک خوبصورت فضا دیکھنے کو مل رہی ہے۔ مختلف مکاتبِ فکر سے تعلق رکھنے والے افراد امام حسینؑ کی عظیم قربانی کو انسانیت، عدل، حق اور امن کا مشترکہ پیغام قرار دیتے ہوئے باہمی احترام، اتحاد و اتفاق اور مذہبی ہم آہنگی کے فروغ کے عزم کا اظہار کر رہے ہیں۔
علمائے کرام، ذاکرین، سماجی شخصیات اور مذہبی تنظیموں نے عوام سے اپیل کی ہے کہ اربعین حسینیؑ کے موقع پر نظم و ضبط، باہمی احترام، رواداری اور اتحادِ امت کے جذبے کو فروغ دیتے ہوئے امام حسینؑ کے پیغامِ صبر، ایثار، عدل اور انسانیت کو عام کیا جائے۔