ہزاروں سوگواروں کی موجودگی میں شہید علامہ تقی ہادی اور شہید حماد رضا کی نماز جنازہ امروہہ گراونڈ انچولی میں ادا کردی گئی

جعفریہ پریس- جعفریہ ڈیزاسٹر سل ( جے ڈی سی ) میں شعبہ تعلیم کے سربراہ ، میٹرک بورڈ آف ایجوکیشن کے ویجیلنس ڈیپارٹمنٹ کے ڈائریکٹر اور معروف شیعہ اسکالرعلامہ تقی ہادی نقوی شہید اور شیعہ علماء کونسل نارتھ کراچی زون کے ایڈیشنل جنرل سیکریٹری شہید حماد رضا کی نماز جنازہ ہزاروں سوگواروں کی موجودگی میں ادا کردی گئی۔ نماز جنازہ علامہ رضی جعفر نقوی کی اقتداء میں ادا کی گئی، جس میں جے ڈی سی کے سربراہ و شیعہ علماء کونسل پاکستان  کے مرکزی رہنما علامہ شہنشاہ حسین نقوی،شیعہ علماء کونسل کے مرکزی جنرل سیکریٹری علامہ ناظر عباس تقوی و دیگر علمائے کرام، ذاکرین عظام و نوحہ خوان حضرات سمیت ہزاروں کی تعداد میں سوگواران نے شرکت کی۔
نماز جنازہ میں انتہائی رقت آمیز مناظر دیکھے گئے، نماز جنازہ میں شریک ہر آنکھ اشکبار تھی اور شہید علامہ تقی ہادی اور شہید حماد رضا کی خدمات کو خراج عقیدت پیش کررہی تھی۔ نماز جنازہ کے بعد شہید علامہ تقی ہادی کی تدفین وادی حسین قبرستان جبکہ شہید حماد رضا کی تدفین وادی السلام قبرستان میں کی گئی۔ واضح رہے کہ علامہ پروفیسر تقی ہادی اور حماد رضا کی شہادت پر شیعہ علماء کونسل پاکستان کی جانب سے ملک بھر میں تین روزہ سوگ اور جمعہ کے روز احتجاج کا اعلان کیا گیا ہے ۔